ORANJESTAD (AAN): Den oranan di atardi, durante un control rutinario, Aduana a detene un homber cu tabata den posesion di un cantidad y tipo di droga no divulga,
tampoco ta conoci si el a purba di drenta of sali for di Aruba cu e droga. E sospechoso a logra huy for di custodia y core bay den area di Wayaca Residence.
Helicopter a duna asistencia pa localiza e homber mas lihe posibel. Algun residente di Wayaca hasta a wak e sospechoso ta core riba caya, purbando di sconde den mondi. Di biaha e residentenan a WhatsApp den group chat, pa tur hende keda den alerta y cera porta y bentananan den caso e sospechoso dicidi di sconde den nan cas of cura. Danki na e tip di un residente cu a wak e sospechoso y a alerta polis, nan por sigui e ruta cu el a tuma.
Despues di un buskeda basta extenso, cu a conta cu participacion di varios unidad di polis, incluyendo K-9 y Team di Aresto, a logra detene e homber di inicial R. den area di Santa Marta.
