*Husticia a libera e dama deteni pasobra e no ta doño mas di e auto
ORANJESTAD (AAN): Diaranson den oranan di anochi, vocero di Cuerpo Policial, señora Liliana Rasmijn a informa cu e homber J.J.R.D. naci na Venezuela di 44 aña a presenta na warda di Balashi, hunto cu su abogado, en conexion cu e accidente fatal cu a tuma lugar diadomingo madruga.
El a keda deteni na warda di Balashi pa cu e investigacion di e caso fatal aki .
E caso di accident fatal di Diadomingo marduga riba caminda di Tanki Leendert pa Paradera na altura di Tao Bao Store na Shiribana, a haya un twist e siman aki.
Basa riba informacion forensico obteni di e Honda Fit ros cu a ser kima den area di Wela cerca di Franse Pas, Polisnan a acudi na un cas na Primavera unda a detene e muher cu ta aparece ainda como e doño registra di e auto.
Aparentemente tin hende cu ta bende nan auto sin percura pa e “registro” wordo kita completamente di nan. Y esey ta loke a pasa cu e dama aki di inicial A.C.C.D. di 30 aña di edad.
E dama aki cu tabata e doño original antes di e Honda Fit, a palabra cu e cumprado nobo cu e registro di “nomber y adres” di e vehiculo lo wordo transferi te ora cu e caba di haci tur pago rond di e compra. Aparentemente e cumprador ta un venezolano conoci como Jesús Rosendo di 44 aña di edad. E no a paga nunca mas e ultimo pago.
Esey ta e motibo pakico e auto keto bay ta registra na nomber di e dama di Primavera.
El a splica Polis cu e no tin e Honda Fit color ros mas, y ta imposibel cu e tabata tras di stuur di e auto ora Diadomingo marduga a dal e dama Julieth Patricia Patiña Castro dilanti Tao Bao na Shiribana. E tin prueba ta unda e tabata e anochi ey, y cu el a regresa cas trempan.
Cu tur e pruebanan aki, Ministerio Publico a dicidi pa laga e dama di Primavera bek den libertad, y awor nan ta focus riba buskeda di e homber Jesus Rosendo.
Mirando e hecho cu Jesus Rosendo sa cu el a dal un hende mata, y cu el a hasta tuma e decision extremo di kima e Honda Fit color ros aki den mondi cerca di Wela, ta mustra cu su meta ta pa sconde prueba pa e no wordo descubri.
Auto haya na Wela: Tabata Diamars den oranan di mainta, a bin haya sa cu den area di Wela cerca di Franse Pas, tin un skelet di auto tur kima. Autoridad a bay eynan, y a bin haya un auto parecido na un Honda Fit recien kima.
Aki a manda Recherche y team forensico di BFTO pa check si por haya detaye di e auto aki, incluyendo VIN-number of e Motor-number, cu por yuda localiza e nomber di e doño, of a lo menos e nomber di e persona cu a keur e auto aki.
E descubrimento di e auto aki tabata un wake-up call pa autoridad, cu e persona cu a dal e dama mata na Shiribana, cueste loke cueste tin intencion di sconde y no para responsabel pa e acto.
E dama di inicial A.C.C.D. di 30 aña di edad lo a bin realiza awor ki mal consecuencia tin ora cu bo ta bende algo, y bo “nomber y adres” ta keda registra ainda riba e documentonan. E dama a perde como mitar dia encarcela y pasando den situacion dificil di interogacion.
