Cinco di nan a perde nan rijbewijs
ORANJESTAD (AAN): Departamento di Trafico y Unidad Motorisa a intensifica nan control durante e Parada di Flambeu, resultando den e detencion di 11 chauffeur cu tabata stuur bao influencia di alcohol. E controlnan a tuma luga prome, durante, y despues di e parada.
Na e comienso di e parada, Departamento di Trafico a atende na diferente situacion cu a surgi, incluyendo vehiculonan cu no tabata tin nan documentonan na ordo y hasta un UTV.
Paralelamente, e Unidad Motorisa a efectua controlnan strategico na diferente parti di e ruta durante e parada.
Den total, a detene 11 chauffeur, di cual 5 a perde nan rijbewijs.
Cuerpo Policial ta enfatisa cu nan ta intensificando e controlnan y nan apelacion ta pa hende no stuur auto bao influencia di alcohol.
Nan ta adverti cu e controlnan lo continua durante e otro paradanan di carnaval, y nan ta pidi pa tur hende coopera pa mantene e caminda safe pa tur.
