ORANJESTAD (AAN) — No necesariamente mester ta registra pa haya e vacuna contra Covid-19, durante e dos dianan di vacunacion nacional, yama Vacunathon, Diasabra y
Diadomingo 24 y 25 di April awo, sinembargo e mandatario ta pidi pa tur esnan cu ta bay vacuna, registra toch.
Den conferencia di prensa di gobierno, pa update e tema di Covid-19, Minister di Salud Dangui Oduber a splica cu registra ta facilita e proceso pa esnan cu ta organizando e dos dianan di vacunacion nacional aki, pero si no a logra registra por “walk in” na un di e cuater localidadnan ya menciona, unda tur hende ta bon bini, sea tin passport Hulandes, tin firma liber of ta indocumenta tur hende ta bon bini pa vacuna, e dignatario a enfatiza, pa logra e meta comun.
“E vacuna aki a prueba di ta e solucion, no solamente pa Aruba pero pa mundo henter. Por mira resultadonan directo na paisnan cu ta hopi mas avanza den vacunacion caba, y na Aruba tambe nos ta mirando e resultadonan den nos hospital, nos ta mira e ultimo simannan cu e situacion ta mehorando, tin menos persona ta wordo hospitaliza, tin mas persona ta saliendo for di hospital cu esnan cu ta wordo interna. Esaki ta un indicacion cu e vacuna ta dunando e resultado cu nos ta buscando. E vacuna ta bon pa proteha y cuida bo mes y pa cuida otronan, y mas importante pa bo sigui cu e recuperacion di nos turismo y nos economia”, Minister Dangui Oduber a remarca.
El a haya importante pa menciona tambe, cu un criterionan cu CDC (Centers for Disease Control & Prevention) , cu ta e Departamento di Salud Publico na Merca ta uza, pa duna e nivel di riesgo na destinacionnan, ta e grado di vacunacion di un pais.
“Kiermen, mas halto mucho miho e conseho di CDC ta, pa e turista Mericano cu tin deseo di bishita Aruba, y ta importante pa tur hende akinan ta conciente di e importancia di vacuna. No solamente pa cuida y proteha bo mes pa yega na e herd community pero tambe pa e progreso di nos pais, nos turismo y nos economia. Nos ta mirando cu Aruba ta den pleno proceso di recuperacion. E cifranan di Luna di April ta sumamente positivo; nos ta bay yega casi 60 mil turista cu ta casi 60% di nos recuperacion”, Minister Dangui Oduber a señala.
E mandatario a reitera e importancia y e motibo pa cual a bin cu e dos dianan di vacunacion nacional aki, y a expresa cu na final di dia nos tur kier hiba un bida un tiki mas normal pasobra ya caba e pandemia tin un poco mas cu un aña na Aruba, y tur hende ta cansa di e virus. “Pero pa nos por prospera y progresa nos tin cu vacuna. Nos no ta obliga ningun hende, pero nos ta mira si, kico ta e resultadonan cu ta algo safe, y mas importante ta cu nos ta mira cu menos persona ta wordo hospitaliza”, Minister di Salud a acentua.
Finalmente, el a reitera su yamada na comunidad pa haci uso di e dos dianan aki, pa presenta cu un smile y e carchi di AZV, y mustra cu bo ta stima e pais aki y e union, pasobra nos tur hunto so por logra vence e pandemia aki.
