ORANJESTAD (AAN): Un caso masha lamentable a tuma lugar diabierna atardi pa mas o menos 3:10, na unda Central di Polis a wordo notifica di un caso di hincamento na Modanza.
Ora patruya a yega na e lugar, a bin topa cu e victima. Ambulance tambe a presenta pa duna asistencia medico na e victima y a transport'e pa hospital.
Recherche a presenta na e sitio pa cuminsa cu e investigacion pa determina kico exactamente a sosode.
Un rato despues, vocero di Polis, Liliana Rasmijn a indica cu polis a detene un total di 8 hoben menor di edad, cu a wordo transporta pa warda di Playa.
E caso ta bao investigacion y situacion di e hoben cu a wordo hinca te cu awo ta stabil.
