Caso serio Diamars atardi na San Nicolas
- Mucha su curason casi no tabata bati mas
- Transporta cu Air Ambulance pa Colombia
ORANJESTAD (AAN): Riba Diamars, e temperatura na Aruba den dia a yega tur skina di e isla na 31º Celsius, y solo tabata kima sin misericordia. Den oranan di mainta so tabatin tiki yobida leve den area di Noord.
Sinembargo pariba di Brug, esaki tabata seco y cu masha poco nubia mes pasando riba Aruba. Ora cu temperatura ta 31º Celsius... cu solo fuerte e ora den e parti interior di un Auto of un Van, temperatura por yega dentro di un ora na entre 50º Celsius te cu 60º Celsius. Pues casi 140º Fahrenheit, cu ta pone sinti paden casi mescos cu un forno. E interior di un vehiculo por ta semper 30 te cu 40º Celsius mas hopi compara cu e temperatura di pafo.
A lubida mucha den vehiculo: Den tur e calor ey di Diamars, ningun hende por a imagina cu un mucha chikito di como 5 aña di edad a keda den un vehiculo cera... te cu e criatura a bay den un ‘heat-stroke’ severo.
E mucha di 5 aña ta bay scol preparatorio, y na final e tin di djis warda pafo pa un Van di un Crèche ta pasa buske. E Van aki ta e transport’e tur merdia for di Scol pa e Crèche.
Pero riba Diamars merdia, ora di yega na e Crèche y a staciona e Van, aparentemente e Driver cu ta traha na e Crèche a lubida cu e mucha ta sinta patras. El a staciona e Van, cera tur bentana y lock e portanan, y a bay paden.
Asina e pober mucha a keda den e Van, unda e temperatura den 60 minuut lo a yega entre 50º pa 60º Celsius. Dashboard di vehiculo por hasta yega 85º Celsius y por laga quemadura na bo braza of man si bo mishi cu ne. Tin di corda cu e curpa di un mucha ta bira cayente 3x te 5x biaha mas rapido compara cu adultonan.
Heat-Stroke serio: Si acaso un ser humano keda mas di un ora den calor asina, sin liquido pa bebe, y temperatura ta 45º Celsius of mas... ya caba su bida ta den peligro severo, y chens grandi pa mortalidad ta subi rapidamente.
Pesey no tin ningun situacio safe pa laga muchanan pa nan cuenta den un auto, hasta pa un rato so. Pa colmo vehiculonan cu ta di color preto of scur pafo, ta bira cayente mas rapido parti paden.
Curpa di e mucha ta cuminza produci hopi sudor, pero debi na e calor inmenso dado momento e ta stop, y e cuero ta cuminza bira seco y hopi cayente. Aki ta bin cu situacion neurologico, unda e mucha ta bira confuso, desorienta, comportamento ta bira iracional, y por cuminza bay fo’i tino.
E calor inmenso aki ta duna e mucha dolor di cabez severo, e por induci sacamento, mareamento, y halamento di rosea ta aumenta, cu respironan chikito.
Organonan den curpa ta cuminza daña rapidamente door di e calor extremo aki, incluyendo e curazon, higra, y riñon.
E tata a yega crèche: Te atardi manera costumber, despues di e trabao na caminda pa cas, e tata ta yega na e Crèche pa asina busca su yiu. Na e Crèche ora cu nan a mira e tata yega, nan a haya raro pasobra henter merdia pa atardi nan no a mira e mucha paden.
Aki ta unda cu a busca rond pero no haya e mucha, y ta ora cu a core bay wak den e Van cera, a bin haya e criatura inocente fo’i tino. Esey ta indica cu e sistema nervioso central di e mucha a cuminza desfunciona, e organonan a cuminza faya, su cerebro lo por a hincha, y por ponebo bay den coma.
Un persona no a perde pa gana, y a core hiba e criatura pa Servicio di Emergencia na ImSan na San Nicolas cu ta hopi cerca. Na yegada a core pidi pa auxilio, y mesora nan a lage bay paden pa asistencia. E temperatura di e mucha tabata basta halto, y a cuminza spuit e curpa cu awa, y a pone un ECG Machine pa check su curason.
Tin indicacion cu e curason tabata bati iracional y no corecto, y aki ta unda cu casi tur docter na ImSan a cuminza duna tratamento na e criatura aki. Nan a haci uzo cada uno di nan conocemento, y di tratamento cu nan ta memorisa pa situacion asina.
Nan a traha basta rato cu ne pa asina trata di stabiliza e curason, cu tabata un proceso basta largo. Dado momento a realiza cu e tin di wordo hiba pa tratamento mas avanza na Hospital, y asina a pidi pa presencia di Ambulance pa haci e transporte. Pero Diamars atardi tabata uno hopi druk pa emergencia medico rond di e isla, y tur Ambulance tabata riba caya ta atende situacionnan.
Polis a habri caminda: Mientras tanto a haya un Ambulance cu a yega ImSan, y cu patruya di Polis su dilanti a habri caminda pa bay pabao cu ne. Polisnan di Santa Cruz, y unidadnan motoriza a yuda cera varios rotonde pa asina Ambulance por pasa sin problema. Atardinan despues di 5:00 pm semper ta hopi druk na Aruba y cayanan ta congestiona. Pues e yudansa aki di Polisnan di San Nicolas, Santa Cruz, y Oranjestad a yuda bastante.
Transporta pa Colombia: Te cu Diaranson atardi, a haya indicacion cu e mucha tabata den situacion critico interna den Intensive Care Unit na Dr. Horacio Oduber Hospital.
Sinembargo specialistanan a bisa cu e tin di acudi na unidadnan specializa pa situacionnan asina, pues a dicidi cu e tin di bay cu urgencia pa Hospital na Bogota, Colombia. Cu Air Ambulance riba Diaranson atardi el a wordo transporta pa Bogota.
Indicacion ta mustra cu Recherche di San Nicolas ta investigando e caso aki, y kizas Ministerio Publico tin di tuma un decision si acaso e driver di e Crèche tin di bay responde penalmente pa e sucedido of no. Ta haciendo peticion pa comunidad di Aruba haci oracion pa salud di e mucha.
