LandsRecherche a cuminza investigacion
- Lo kier haya sa kico a socede na Warda di Polis na Shaba
ORANJESTAD (AAN): E ta un caso cu diripiente a haya un swing, cu hopi teoria ta plama pazuid-panort di loke a socede. Loke a empeora tur esaki, ta cu tin un video graba durante su aresto unda Polis cu man duro a detene, y hibe pa vehiculo di rescate pa Warda di Polis.
Pero awor tin un potret di e victima den Hospital, unda bo ta mira cu su cara ta na werki cu multiple herida. Esakinan no ta parce di ta golpi cu e lo a ricibi durante e aresto.
Loke a socede: Unidad di Polis di Noord a wordo manda pa area di Palm Beach, patras di Wendy’s Palm Beach y tambe Unicasa Supermarket pa un persona cu mal comportacion riba caya.
Polis a yega y bin topa cu e homber Juan C. Croes visibelmente basta bao influencia, y pa stop su fechoria riba caya, a dicidi na arest’e. Pero el a cuminza resisti pa su detencion, y facilmente Polis a domin’e y pone na suela, y a manda busca Vehiculo di Transporte. Tin un video graba di esaki door di un testigo, y ta mira e.o. con Polisnan a carga e homber kende keto bay tabata grita, y a pone den e vehiculo, y asina el a ser hiba na Warda di Polis na Shaba. Aki el a wordo presenta dilanti Fiscal Auxiliar, kende a duna ordo pa e keda deteni den cel na e Warda ey mes.
A bin haye fo’i tino: Vocero di Polis a indica, cu Diamars atardi banda di 3:23 pm durante un control rutinario den cel di detenidonan na Shaba, a bin topa cu e detenido for di tino y no ta reacciona. Di biaha ta notifica Chef van Dienst y na su turno ta yama y pidi pa Ambulance.
Ambulance a yega na Warda di Polis Shaba pa duna asistencia medico na e hende homber y a dicidi cu ta bay transport’e di biaha pa Servicio di Emergencia na Hospital. Aki nan a haya nan ta dune tratamento serio, debi cu na diferente trauma severo cu e tin na su cabez, na su cara, y mester a hasta pone riba mashin pa hala rosea. Pues ta manera el a haya un “bati di otro mundo”, y no por ni papia mas.
El a keda hospitaliza den situacion critico, pero Diaranson den oranan di madruga, Central di Polis a wordo notifica cu e situacion di e detenido Juan C. Croes a empeora y a fayece.
Ta trata di e hende homber di inicial Juan C. Croes, conoci pa hopi hende como ‘Carlito’, naci dia 16 di Februari 1974 na Republica Dominicana, pues tin 52 aña di edad. Mesora a notifica tur autoridad competente. Como procedimento normal, e caso aki ta bao investigacion di Landsrecherche y Ministerio Publico.
Nan lo bay investiga tur cos, pa check tur security video pa e.o. mira con e detenido a drenta na Warda di Polis na Shaba, y check e video despues con el a sali riba stretcher di Ambulance.
Mientras tanto, DIARIO y tambe Cuerpo Policial Aruba ta manda palabra di condolencia na famia di e fayecido.
