ORANJESTAD (AAN) -- Den nomber di Ministerio di Husticia y Asuntonan Social, nos kier extende palabra di profundo condolencia na e famia, conocirnan y henter e famia blauw cu e perdida di Señor Ivan Kelie cu a fayece recientemente.
Sr. Kelie na bida tabata e ex Polis como tambe e miembro di mas bieuw di P.O.V.A Club. Señor Kelie tabata e pilar di P.O.V.A. schietclub, na banda di esaki e tabata tin su propio schietclub caminda e a representa Aruba den varios torneo di tiro rond mundo.
Señor Kelie tabata Presidente tambe di International Police Association (I.P.A.) seccion Aruba, pa algun aña.
Su trayectoria, na bida, ta uno cu nos kier para keto na dje y brinda e debido honor y respet na un baluarte di Cuerpo Policial di Aruba. Señor Kelie tabata tin un trayectoria largo den Departamento di Trafico, y algo memorable ta cu e tabata e motor di e programa di 15 minuut na Tele-Aruba, tur Diamars anochi, yama “Seguridad den Trafico” cu a siña hopi ciudadano local, ser un miho chofer y core responsablemente riba caminda.
El a skirbi diferente articulo den corant tocante seguridad den trafico tambe. Y cu esaki, nos ta pidi pa paz na su restonan y ta desea su famia hopi forsa na e momentonan dificil aki.
Ivan Kelie ta tata di e conocido presentador Ivan Kelie Jr. tanto na TV como na radio.
DIARIO tambe ta expresa su profundo condolencia pa e famia di señor Ivan Kelie, KPA, amistadnan y comunidad cu a perde un gran ciudadano!
