ORANJESTAD (AAN):  Na momento cu sr Mike Eman y AVP a opta pa pone un sospechoso den un caso penal riba lista,

esaki a crea e oportunidad cu Aruba por conoce e prome parlamentario cera den KIA. Esaki sigur, locual sr. Mike Eman y AVP a haci, ta un falta di respet total na pueblo, pero sigur falta di fatsoen y moralidad. Poniendo sr. Benny Sevinger riba lista di AVP ta simbolo di aceptacion cu corupcion ta algo normal; bao di politiconan di AVP y sigur ta bin e pregunta si e sostenedornan di AVP tambe lo bai urna pa sostene corupcion den nos pais. 

Ley ta permiti Benny Sevinger di ta un parlamentario

            Conforme nos constitucion y leynan vigente ta permiti pa un persona cu ta riba lista y ta sospechoso of sera y cu ainda no ta condena pa por bira parlamentario. Pueblo por djies imagina nan mes cu si sr. Benny Sevinger cu awo ta participa na e eleccion 2021 saca su mes, e por asumi e rol di parlamentario sin niun problema. E unico manera cu e no ta bira parlamentario ta si su persona mes nenga e asiento den Parlamento of si e ser condena y kita di su derecho di voto. Si sr. Benny Sevinger acepta e asiento, esaki lo nifica cu ta pa prome biaha den historia di pais Aruba cu riba 9 di juli 2021 un parlamentario lo mester huramenta na boei dilanti Gobernador. Pregunta ta: te asina leu nos moralidad politico di e pueblo Arubano mester yega?

Candidatonan di AVP pro corupcion y degradacion moral

            Ora bo keda keto y acepta cu sr. Mike Eman ta pone riba lista un colega cu ta sospechoso principal den caso di labamento di placa, fraude, corupcion y mal uso di poder como minister, ta hasi nan complice di tur e maldadnan di AVP. Mi lo kier sa e opinion di e profesor number 5 di AVP di si no ta berdad cu e posibilidad ta existi cu sr Benny Sevinger por bira parlamentario y kico ta su opinion riba esaki? Paso mi no por biba di kere cu mi por wak ainda candidatonan di AVP ta sostene e tipo di bagamunderianan aki cu a hasi hopi daño na e imagen di pais Aruba.

            Pa termina mi ta spera pueblo ta consciente di e mal imagen cu partido AVP ta causando pa Aruba. Aruba ta wordo propaganda internacionalmente como un pais pro corupcion. Na Aruba AVP ta e unico partido den historia di Aruba cu ta pone un candidato, cu nan sa cu ta sospechoso, riba lista y cu lo por ta e prome candidato cu por bira un parlamentario sinta den KIA. Un berguensa total, falta di respet, fatsoen y moralidad na nos pueblo di Aruba.