Alto Comisario Ramon Arnhem
ORANJESTAD (AAN): E caso di tiramento di Diasabra marduga, a bin acerca di e otronan cu a socede ultimo dos siman na Aruba.
Alto Comisario Arnhem mes a duna un declaracion, splicando con den e ultimo dos simannan Aruba a keda sacudi pa varios incidente di tiro. E fin di siman aki un otro incidente teribel a tuma luga, caminda lamentablemente un mama di dos yiu chikito a perde su bida.
“Promer cu tur cos, na nomber di Cuerpo Policial Aruba, mi kier expresa mi mas sincero condolencia na e famia y tur e sernan keri di e victima, especialmente na e dos yiunan chikito cu a perde nan mama. Loke a sosode ta teribel, cobarde y inaceptabel. Esaki no ta cuadra cu e Aruba cu nos ta representa,” e hefe di Polis a bisa.
“Mi ta compronde e sentimentonan di tristeza, rabia y inseguridad cu e incidentenan aki ta causa den nos comunidad. Pero mi mensahe ta cla: Esnan cu ta responsabel pa e acto di violencia aki, nos lo busca, localisa y detene nan. Esaki no ta conta solamente pa esun cu a hala gatillo, sino pa tur persona cu tabata involucra den e hecho aki. Niun hende lo sali liber di su responsabilidad,” el a declara.
El a splica cu den e periodo cu ta bin, nan lo aumenta e presencia riba caya y lo haci uzo dirigi di nan capacidad di inteligencia y investigacion pa identifica y detene e responsabelnan.
Nos lo ta presente. Nos lo actua. Y nos lo haci ley prevalece. Mi ta compronde e preocupacion y e sintimento di incomprension den nos comunidad, y tambe cu hende ta wak na polis pa un solucion. Mi ta compronde esaki, pasobra hopi biaha polis ta wordo mira como e instancia cu mester bin na rescate di comunidad. Y nos lo ta ey ora cu ta necesario. Nos comunidad por conta cu nos.
“Mi por asegura boso cu polis na Aruba ta dedica su mes cada dia, tanto visibel como tras di cortina, cu tur conviccion na seguridad di nos comunidad. Nos resultadonan di investigacion di e ultimo añanan ta mustra cu nos ta logra identifica, localisa y detene responsabelnan di delitonan grave. Tambe den e casonan di tiro aki, nos ta pone tur nos esfuerzo pa logra detene esnan responsabel.
Den su mensahe final, el a bisa: “Nos lo traha duramente pa localisa y detene e responsabelnan di e delitonan aki. Esun cu ta pensa cu e tipo di violencia aki e por perturba nos comunidad y despues sigui su caminda sin consecuencia, ta completamente robes. Polis lo actua y lo haci ley prevalece.”
