ORANJESTAD (AAN): Kizas e momento a yega, cu si bo bay beach y dado momento bo kier dal un sambuya den lama, kizas bo tin di bay busca un estuche special waterproof pa bo pone bo smartphone aden, y drenta den lama cu e aparato.
Pasobra na Aruba e fenomeno di horta bo pertenencia for di riba beach a bira algo cu ta socede casi tur dia. Na comienzo e tabata wordo observa hopi den area di Arashi como tambe Boca Catalina.
Pero ultimo tempo ta na Eagle Beach esaki ta socede regularmente awor. Esnan cu ta goza di un dia na lama, ta lanta y bay dal un chapuzon den lama, y lagando nan smartphone, cartera, y demas pertenencia den tas of kizas lora den serbette riba beach.
E problema na Eagle Beach, ta cu ora bo ta den lama, e distancia pa bo pertenencianan riba beach ta basta grandi. Esaki ta un problema pasobra bo no tin bon bista mas riba e pertenencianan cu bo ta laga atras.
DIARIO a haya sa cu riba Diasabra cu a pasa, tres studiante hoben di Aruba a perde nan smartphone asina. Testigonan a mira un ladron hoben a pasa listra den nan pertenencia y a bay cu e aparatonan.
E ladron no sa con duro studiantenan ta pasa pa por haya un smartphone awendia. Envez cu e ladron busca un trabao y trata na yega na un celular cu su propio placa, e ta bay perhudica hendenan inocente, y principalmente studiantenan cu mester di dje pa scol.
Ta bisto cu e ladron tabata djis interesa den smartphone, y no a preocupa pa bay cu placa cu e studiantenan tabatin atras tambe riba beach. Nan a horta smartphone, incluyendo uno cu ta basta bieu y ni su camera no ta funciona mas.
Pa colmo, e boletin oficial cu Vocero di Polis a emiti pa Diasabra 24 di April 2021, no ta inclui ni un mencion di e ladronicia aki. Ta parce comosifuera cu Polis no kier pa publico sa di e ladronicia aki.
Pero e victimanan mes a informa DIARIO di loke a pasa cu nan riba beach, y awor ta adverti publico cu ta bay Eagle Beach, pa nan ta cauteloso como cu ladron ta hopi activo mes den dia. Si bo ta bay beach cu un smartphone, bo por cumpra un estuche waterproof pa asina bay baña cune y colge rond di bo garganta. Tambe tin algun smartphone nobo awendia cu tin e rating di IP68. Esey nifica cu e smartphone por resisti stof, sushi, y santo, y por wordo submergi den awa te na un profundidad maximo di 1.5 meter pa maximo 30 minuut.
