Horta for di container
ORANJESTAD (AAN): Diadomingo cu a pasa, riba e parkinglot grandi dilanti Stadion Guillermo P. Trinidad na Dakota tabatin e gran evento di Rotary Club Aruba, esta e tan spera ‘Fiesta Rotaria’ cu a regresa.
Un evento pa Rotary Club yuda recauda fondo pa asina ehecuta proyectonan social na beneficio di comunidad. Na final di e actividad, boluntarionan a keda yuda pa asina recoge tur loke a resta y warda nan safe den un container berde cu ta poni banda pazuid di Stadion.
Diadomingo anochi pa 7:00 pm, nan a bay laga e container cera y intacto atras. Pero nan no a pone riba candal. No a pone candal riba e container, como cu lo bay laga un Security Guard anochi pa cuida tur cos.
Figurabo cu toch ladron tambe a pasa di bishita na Fiesta Rotaria, pero den oranan di marduga.
Dialuna mainta pa 7:00 am ora cu e ciudadano L. a presenta pa sigui cu e trabaonan, el a bay pa habri e container berde aki y a bin descubri cu esaki ta bashi.
Hende desconoci a bay cu 15 cashi di palo, tambe 20 pa 30 canasta blauw pa haci compras cu e emblema di ‘Kraft’ riba nan. Tambe a horta 2 caha cu ta yena cu bandera y decoracion di Fiesta Rotaria.
Con esaki por ta? Pasobra Fiesta Rotaria a laga un Security Guard pa cuida. E ora e ciudadano L. a bay papia cu e Security Guard.
Security a bise, cu el a mira 2 truck blanco di transporte, y un Mitsubishi blanco, den cual hendenan tabata pone mercancia aden. Security a usa su smartphone y a saca potret di e Trucknan di Transporte.
Awor tur esaki a ser entrega na Polis, cu a tuma denuncia di e caso aki. E investigacion awor a cuminza, y Central di Polis a ser poni na altura.
