ORANJESTAD (AAN): Luna di November a cuminza druk pa autoridad policial, y team di Recherche cu ta investiga traficacion humano na Aruba.
Basa riba e hecho cu a haya hopi indicacion, tips, y inteligencia riba algo incorecto cu ta pasando den e caya di Rembrandtstraat na San Nicolas, a acerca Ministerio Publico pa pone na altura di e desaroyonan. Asina a duna luz berde pa tene un razzia simultaneo den e caya aki, cu ta core paralelo cu caya principal di Zeppenfeldtstraat na San Nicolas.
Rembrandtstraat ta un caya cu ta solamente 320 meter largo, pero e oficialnan di Polis a yega mainta trempan, cera tur entrada y salida di e caya, y forzosamente a drenta na 6 diferente porta cu tin. Vocero di Ministerio Publico, Ann Angela, a confirma cu a tene entradanan hudicial na seis diferente adres den Rembrandtstraat.
E buskeda di e oficialnan tabata simple: Check si tin hende cu ta indocumenta den e adresnan aki, y alavez check si nan por ta victima di traficacion humano. E resultado di esey ainda no a wordo divulga na prensa.
Vocero Angela a bisa cu ningun hende a resulta deteni den e razzianan aki den Rembrandtstraat.
El a bisa si, cu un unidad di Polis y Recherche a ehecuta un Entrada Hudicial na un cas den Caya Guadeloupe tambe, cu ta keda entre 95 pa 186 meter leu. Tin indicacion cu nan a bay busca un persona eynan, pero no a haye. Pues aki tampoco no tabatin detencion.
Toch autoridadnan ta mustra cu awor a haya mas detayes extra, y no ta descarta posible detencion den dianan venidero.
