Polisnan a canta Bingo durante control general
- Accion hudicial contra arma di candela riba caya
ORANJESTAD (AAN): Siman pasa, Fiscal di Ministerio Publico a haci un anuncio general na henter Aruba, pa indica cu autoridad hudicial a duna luz berde, cu Polisnan riba caya por haci control preventivamente, pues e asina yama ‘Preventief Fouilleren’ den cierto zona di e isla. Ministerio Publico a duna OK pa e controlnan aki wordo haci riba posesion di arma di candela.
Algun observador a pensa mesora cu Polis ta actuando awor mas fuerte, desde cu e tiramento a socede dos weekend pasa na Palm Beach unda un hoben menor di edad a perde su bida debi na uzo di arma di candela.
Fiscal a bisa cu e control den weekend cu a pasa tin como meta pa aumenta siguridad riba caya y baha e riesgo cu posesion y uzo di arma di candela ta encera.
E medida ta valido pa Distrito II (hotel zone), y tambe Distrito III (pariba di brug). Pa Distrito II: Esaki ta conta pa Palm Beach, J.E. Irausquin Boulevard y WVB Boulevard y vecindario. Pa Distrito III: Esaki ta conta pa Pos Chiquito, Sabana Basora, B. van de Veen Zeppenfeldtstraat, Kazernestraat, Marnixstraat y Caya St. Maarten te cu Caya Nevis.
E medida a drenta na vigor Diabierna 29 di Mei, y a dura te Diadomingo 31 di Mei, for di 6:00 pm te cu 6:00 am. Sigur autoridad ta pensa... cu si nan sikiera logra kita 1 arma for di riba caya, cu e medidanan aki tabata bale la pena nan introduccion.
Un captura importante: Control a start riba Diabierna mes, y e anochi ey mes a haci controlnan preventivo y a stop varios auto, y a ristra diferente persona den e dos distritonan aki.
Durante e control na Palm Beach, den zona di Hotelnan (Hotzone), dado momento Polisnan a canta ‘Bingo’! Pasobra durante e accion di ristramento preventivo, autoridad a detene un homber y a confisca cantidad grandi di placa y droga.
Vocero Policial, Liliana Rasmijn a confirma cu e homber deteni aki, tabatin un suma grandi di placa cash den su poder. Ora cu Polisnan a controla den su auto, a topa cu droga y atributonan pa cu uzo y distribucion di droga.
Den e mesun auto aki durante e ristramento preventivo a confisca un arma blanco (‘cuchiu), y tambe a haya y confisca un tubo di Pepperspray di marca ‘The Neutralizer’ cu ta algo ilegal pa bo tin riba caya na Aruba. Tambe a haya droga, aunke Polis no a divulga ki tipo di droga. Pero riba potret por mira cu ta potchinan yena cu marihuana, y tambe por a mira atributonan manera un balans electronico, y tambe un grinder pa mula marihuana.
Ministerio Publico y KPA ta traha estrechamente pa reforza seguridad riba caya y pa proteha particularmente e hobennan di e isla.
E homber awor ta deteni pa wordo interoga, pa haya sa mas di e sospecho cu e ta un dealer di droga cu ta buscando clientenan den area hotelero.
{gallery}Homber deteni cu arma blanco, monton di placa y droga den su poder{/gallery}
