ORANJESTAD (AAN): E sistema electronico cu a wordo instala na Aruba, unda cu Inmigracion Aruba (IA) ta conecta directamente riba computernan di e.o. Ministerio Publico ta birando un herment valioso den e combate contra criminalidad.
Pesey mes, pa algun tempo caba a bira conoci cu ora cu bo ta haciendo un viahe, bo tin di corda cu nan lo parabo na Aeropuerto si acaso bo tin Boet atraza pa paga na Ministerio Publico. Esaki por pone cu bo ta perde bo vuelo, of bo por swipe y paga eynan mes e Boet cu bo tin pendiente.
Pero awor hasta si acaso ta buscando un persona den cuadro di un investigacion, e nomber ta bay aparece riba screen di oficial di Inmigracion na momento cu e scan e Paspoort den e sistema di Radex.
Esey ta loke a socede Diahuebs atardi tambe como 2 ora prome cu un vuelo a sali pa Colombia. E oficial di Inmigracion a check paspoort di un pasahero, y e mensahe di detencion a aparece. Esaki a pone cu mesora e oficial di Inmigracion a yama Grenspolitie Luchthaven, cu a core yega pa asina detene e pasahero.
E pasahero ta e homber di inicial E.S.O. di 42 aña di edad, naci na Colombia y e ta wordo busca pa Jeugd en Zeden Politie (JZP) pa algun tempo caba relaciona cu un denuncia serio di Abuso Sexual di un menor di 13 aña di edad.
A core manda busca Polis di Playa cu a yega cu e vehiculo special di transporte, pa asina bay cu e homber aki pa Warda di Polis, unda envez di ta sinta pendiente di bay disfruta di arequipe na Colombia, awor ta disfruta di pan cu manteca den cel na Aruba.
Un biaha mas autoridad ta satisfecho cu e sistema di alerta aki via di Inmigracion. Bon mes cu Ministerio Publico a duna ordo pa detene e sospechoso aki consecuentemente su nomber ta poni den computernan na Aeropuerto y asina cu el a yega aeropuerto y a purba di coy e vuelo cu destinacion Colombia personal di Grenspolitie Luchtaven a pone man ariba dje.
Awor Jeugd en Zeden Politie (JZP) a tume e sospechoso over pendiente di mas investigacion.
Pa Cuerpo Policial por resolve y investiga mas casonan asina aki cooperacion y informacion di pueblo di Aruba ta hopi importante pesey nan ta pidi si bo tin cualkier informacion yama e Tipline di Polis cu ta: 111-41. Nan ta garantisa cu bo ta keda anonimo.
