ORANJESTAD (AAN): Diadomingo anochi pa 8:45 pm, un unidad di Polis di Noord a ser manda na MooMba Beach na Palm Beach pa un asistencia unda un persona sin permiso a drenta un auto, y awor ta nenga di baha bek.
Polis a yega eynan, y a bin nota cu e asunto ta na un pickup Toyota Hilux doble cabina color di oro. Na e stuurwiel tin e dama B. sinta. El a bisa Polis cu e
homber cu ta sinta na e asiento di patras banda drechi, ta un hende cu a djis yega habri porta, cay sinta y awor no kier baha bek.
Polis a bay habri e porta patras banda drechi, y a tuma nota cu e homber aki ta lomba sunu, bisti cu un short shinishi muha cu un scheur parti dilanti, y a dune ordo pa e baha. El a cumpli mesora cu e ordo.
E ora agentenan a nota cu e homber aki ta bastante bao influencia di alcohol y/of otro substancia prohibi. Su rosea tabata hole masha fuerte mes na uso interno di alcohol, e no por a para drechi riba su pianan, ta papiando cosnan disparate, y ora di ilumina su wowo, esaki tabata basta cora.
E ta asina burachi, cu e no por ni corda con su nomber ta! Polis a rista su curpa, y a haya su cartera cu ta papa muha. Den esaki a bin haya un cedula muha, pa asina haya sa su nomber.
A base di tur esaki, nan a detene e homber pasobra el a viola Articulo 3:52 di Codigo Penal di Aruba, y a wordo transporta cu vehiculo special pa Warda di Playa, unda el a ser presenta dilanti Fiscal Auxiliar. Esaki a duna ordo pa e wordo cera na Warda di Polis na Shaba.
