ORANJESTAD (AAN): Tabata Diaranzon marduga banda di 2:55 am, cu un unidad di Polis di Noord a ser manda na Olde Molen riba Irausquin Boulevard,
como cu aki e bouncernan tin un persona gara, kende a horta tas di un turista y a bay tira esaki den pida mondi.
Polis a yega y topa cu e bouncer di Olde Molen. El a bisa agentenan cu un cliente a bin cerca dje, y a informa nan cu un hende a bay cu su tas di man poni riba Bar. Relaciona cu esaki, e bouncer a pidi manager si nan por bay replay Security Video di e Bar.
E manager a manda e bouncer e videonan di security riba su Smartphone. Riba e video, e bouncer a mira claramente con un hoben a rek y gara e tas aki for di e Bar.
Un rato despues, e mesun hoben aki cu a caba di bay cu e Tas, a yega bek na entrada di e club nocturno. Aki e bouncernan a actua di forma corecto, y a gara e hoben, y a core yama Polis. E hoben a bisa nan cu el a bay zwaai y benta e tas den mondi.
E ora e bouncernan a bay cana cu e homber den e area di mondi, pa e mustra nan unda el a zwaai y tira e tas, pero sin resultado.
Ora cu Polis a yega, nan a tuma e hoben for di bouncernan, y hunto e ora nan a bolbe bay cana den e pida mondi pariba di Olde Molen. Bao di un mata chikito di kwihi, nan a bin haya e tas color oranje.
Diripiente e turista di inicial M. naci na Brasil a yega, y a bisa Polis cu e ta doño di e tas oranje. E turista a bisa cu e tabata na e Bar di Olde Molen ta baliando, y su tas tabata riba e Bar. Banda di 2:30 am e a ripara cu desconoci a bay cu su tas for di riba e Bar. Pesey el a core bay raporta na un bouncer loke a socede.
E turista a habri su tas y a bisa cu e ta haya falta di un placa di papel di 50 Dollar.
A base di tur esaki, Polis a detene e hoben. Su inicial tambe ta M., y a wordo deteni como sospechoso di a viola Articulo 2:288 di Codigo Penal di Aruba. El a wordo hiba Warda di Polis, unda el a keda encarcela.
