ORANJESTAD (AAN): Diaranzon anochi banda di 7:30 pm, net ora cu unidad di Polis di Noord ta coriendo riba Lloyd G. Smith Boulevard,
e agentenan a stop pa atende un señora, kende a hisa man pa nan.
E señora a indica cu e tabata jog ey banda di lama, y for di tera el a mira cu Kite Surfer color oranje cu a cay den lama y e persona no tabata por a hisa esaki mas den halto pa e por move y regresa tera.
El a sigui observa, y el a haya e impresion cu e Kite Surfer ta den problema, debi cu el a cuminza zwaai su mannan.
Polisnan a raporta esaki na Central di Polis, y a pidi pa check si por haya e Helicopter di Polis pa lanta vuelo y check e asunto.
E agentenan mes a bay banda di lama, y a nota cu como 400 meter of mas for di costa, e Kitesurfer ainda ta den lama. Nan a duna detaye na e Helicopter pa mustra unda e Kitesurfer ta mas o menos. E Helicopter a bin topa cune tambe.
Algun rato despues, un boto di piscado a yega cerca, y a bay duna yudanza na e Kite Surfer aki. Despues e boto a regresa na Fisherman’s Hut. Polis tambe a bay eynan. Aki a papia cu e persona cu a baha di e boto.
E Kite Surfer ta un turista di inicial S. tabata mustra demasiado cansa, y el a bisa cu e ta OK y no ta necesario pa Ambulans.
Segun e homber S. a bisa Polisnan, cu e tin 12 aña caba ta practicando e deporte di Kitesurfing, pero e biaha aki e no sa kico a socede cu biento. Esaki tabata su prome biaha na Aruba.
Na final, Polis a informa Central di Polis di e final feliz, danki na e señora atento cu a mira kico ta pasando, na e Helicopter, y na e piscado den su boto.
