ORANJESTAD (AAN): Tabata Diahuebs atardi banda di 2:30 pm, cu unidadnan di Polis tabata coriendo rond na Playa,
a ricibi informacion di Central, cu un grupo di ocho persona cu cuchiu y arma di candela, a yega na un adres na Madiki.
Mesora e unidad a cuminsa mobilisa pa e area, y na caminda a haya extra informacion cu e ocho personanan aki a yega den un Nissan March color shinishi na e adres.
Ora cu Polis a yega, ya e Nissan March a bay. Nan a wordo acerca pa un ciudadano di inicial J., y el a splica nan cu e caso mes a socede cerca di ‘Just Great Minimarket’ na Madiki.
E persona a splica cu un grupo di como ocho homber, cu cara tapa full cu ski mask di cual wowo so ta visible, y den nan man cu cuchiu, biga di palo, bloki di beton, y arma di candela a yega eynan y nan tabata buscando su primo.
E primo tambe tabatey ora cu Polis ta papiando. E primo di inicial C. a splica cu e tabata sinta pafo di e Minimarket, ora cu un Nissan March shinishi a stop, y ocho homber a baha y cuminsa core den su direccion.
Ora di mira e grupo ta bahando di auto cu tur arma, e primo a core drenta e negoshi, y a lock e porta di hero, pa evita di wordo maltrata door di e grupo di homber aki. Ora cu e hombernan no por a drenta e Minimarket, nan a core bay bek den auto. Uno di nan a hasta laga un slof shinishi atras.
El a bisa Polis cu e mesun grupo di homber aki a trata di maltrate caba 3 dia prome den area di Driemasterstraat. Ningun hende eybanda no a mira e plachi number di e Nissan March.
E unidad Policial a duna informacion via Tetra-Radio na demas unidadnan riba caya, pa nan tira bista riba e Nissan March shinishi aki.
Banda di 2:20 pm, personal di K-9 di Polis banda di Santa Helenastraat a mira e Nissan March aki a bira pa bay zuid den Pitastraat. E descripcion ta cuadra cu loke e unidad na Madiki a duna anteriormente.
Polis K-9 a duna e persona tras di stuur un señal pa stop y el a cumpli cu esey. E auto a stop dilanti un cas na Pitastraat. Por a mira cu tin mas di un persona sinta den e auto, y pesey a core pidi asistencia di mas unidad di Polis.
A bin descubri cu den e auto tin en total 3 homber sinta, y a duna ordo pa tur tres saca nan mannan pafo di e auto compacto. E tres personanan a cumpli cu tur esaki. A puntra nan si acaso nan tin arma den nan poder, y si Polis por rista nan. Nan a duna nan cooperacion. Ora cu e hombernan aki a baha di e auto, Polis a bin descubri cu den e auto tin total di 6 cuchiu, un sambechi, un screwdriver, y un ski mask.
Den e auto na e banda di persona tras di stuur di e Nissan March, a bin mira cu un slof shinishi, cu ta cuadra cu e slof cu a ser laga atras dilanti e Minimarket.
Tur tres homber a wordo deteni pasobra a viola Articulo 1 di Ley di Arma, y Articulo 2:255 di Codigo Penal di Aruba, y a wordo transporta pa Warda di Polis na Playa pa investigacion cuminsa.
