ORANJESTAD (AAN): Manera DIARIO a anuncia, ayera mainta te den oranan di atardi, tratamento di e caso penal contra A. Howell (50) y J.van Putten (62) a tuma lugar. Fiscal a haya Howell culpabel di malversacion di
placanan di partido POR y tambe falsificacion di recibonan.
Fiscal ta haya cu Van Putten a wordo usa. Ta acusa Howell di a malversa 197.404 florin mientras cu van Putten algo mas di 100 mil florin. Esaki lo mester a sosode entre 2017 y 2021, tempo cu Howell tabata Parlamento di partido POR y president di e Stichting mientras cu van Putten tabata e tesorero.
Howell a wordo representa pa mr. Canwood mientras cu van Putten a wordo representa pa mr. Arendsz Marchena.
Por a nota cu e Hues y su Griffier, no di Aruba mientras cu Fiscal ta di Ministerio Publico. E Hues ta forma parti di e team special di Huesnan cu ta atende casonan di corupcion den gobernacion.
VAN PUTTEN SCUCHA COMO TESTIGO
Hues tabata kier scucha Van Putten como testigo den caso Howell relaciona cu e factura di Fondo Advisory. Despues cu Van Putten a priminti di bisa e berdad. Hues kier pa Van Putten confirma si a manda mail pa Howell cu e factura su fecha ta Oct. 2022 pero mester ta Oct. 2019. Van Putten a confirma esey y a bisa cu despues cu Howell a mand’e e mail bek, el a manda esey pa accountant.
MALVERSA PLACA DI PARTIDO
Fiscal a bisa Hues cu Howell cu ayudo di Van Putten a malversacion 197104 mil florin. Placanan tabata bay via facturanan falso pa cuenta priva di Howell. Esaki ta malversacion di placanan di partido POR. Den e investigacion di Landsrecherche, a usa e filosofia “follow the money”. For di Gobierno a haya casi 500 mil florin pa fraccion di POR pa por cubri su gastonan.
Na opinion di Fiscal, Howell a laga pasa transaccion di placa di partido riba su cuenta personal. Durante investigacion Howell a laga su abogado facilita un cantidad di facturanan cu ta falso. Landsrecherche durante investigacion no a haya ningun di e facturanan aki.
Fiscal a mustra cu Fonso Advisory a haya algo mas di 65 mil florin. Esaki ta placanan cu Howell a pidi e Stichting pa paga. Na opinion di Fiscal, e factura di pago ta falso. No ta existi Fonso Advisory. Na Departamento di Impuesto no tin ningun informacion. Ta difunto tata di Howell tabata esun tras di Fonso Advisory pero no ta un hurista manera ta para den documentonan. No a haya ningun factura na e cas. Fiscal a mustra cu segun Howell e tabata paga su tata pero no tin ningun prueba di esaki. E factura di pago a wordo traha despues cu e tata di Howell a fayece.
Fiscal a sigui bisa cu riba instruccion di Howell, Van Putten a traha factura di 18 mil florin pa Blue is Foundation. E placa aki a uza pa paga trahador di fraccion R.L. No tin ningun indicacion na kende e placa realmente a bay.
E medio E Arubiano, e dama F.B. a haci trabounan pa POR. Tin pagonan lo a tuma lugar pero segun F.B. ta solamente 10 mil florin a haya y no e mas cu 100 mil florin manera facturanan ta mustra. Tin un diferencia di mas cu 90 mil florin.
Despues Howell a presenta carta di E Arubiano cu ta bisa cu a haya 22 mil florin for di POR. Segun Fiscal, esaki tabata pa demostra cu Howell a haci pagonan na E Arubiano. F.B. a bisa cu despues cu Howell a wordo persigui, el a acerca F.B. pa firma e carta. Fiscal a bisa cu e no tin duda den declaracion di F.B. Howell ta bisa cu el a paga for di su placa F.B., pero Fiscal no ta kere esaki.
NO POR PRUEBA FALSIFICACION
Fiscal a bisa cu Howell tabata coy placanan di POR pa su propio uso. E ta haya cu tabatin falsificacion di documentonan. Sinembargo den e caso di E Arubiano, el a pidi pa declara Howell liber. Fiscal a bisa cu F.B. a reconoce cu el a traha e facturanan.
Pa Van Putten, haya cu el a wordo usa. E caso Sinterklaas, caminda ta papia cu Van Putten lo haya 1 mil florin di placa pa Bashi Premie y Howell 10 mil florin, esaki ta den su contra.
MESTER CABA CU CORUPCION
Fiscal a bisa Hues cu e ta haya cu como politico Howell kier a bringa pa habitantenan di San Nicolas. Investigacion di corupcion ta mustra cu Howell a abusa di confianza cu comunidad a pone den dje. Corupcion ta inacceptable y mester baha cu man duro.
CASTIGO EXIGI
Fiscal a exigi pa Howell, 24 luna di prison, kitando e tempo cu e tabata sera. Pa Van Putten, Fiscal a exigi castigo di 200 ora di trabao pa comunidad of 100 dia sera. Ademas Fiscal a exigi castigo condicional di 3 luna di prison cu 3 aña di prueba.
CONFISCA PLACA DI HOWELL
Fiscal a bisa cu tin beslag poni riba cuenta di Howell cu ta algo mas di 49 mil florin. El a exigi pa e suma aki keda confisca. Tambe el a exigi un multa igual na e placa confisca.
Ta asina cu maňan mainta e abogadonan lo hiba nan defensa.
