ORANJESTAD (AAN): Diamars atardi alrededor di 5:30 pm, bisiñanan den Betonicastraat a tende un explosion masha fuerte mes,
y nan tur a bira nan cara y ripara huma ta sali for di e cas number 41.
Yamadanan a cuminza drenta tanto na Polis y tambe Cuerpo di Bombero di e explosion aki den e caya aki, cu ta keda apenas 150 meter leu for di lama na Mangel Halto.
A resulta cu un lek di gas a produci su mes den cushina, kizas un stoof a keda cendi sin vlam, y cu yudanza di cualkier chispa of relay di motor di frigidaire, a pone cu esaki a produci un explosion.
Un señora di edad kende tabata den cercania a resulta herida. Pesey mes Ambulans a yega na e cas, pa asina transporta e dama pa Hospital pa atende quemadura cu el a ricibi. Awor ta Recherche y Bombero ta bay investiga e causa di e explosion aki.
