Baby a stop di hala rosea
ORANJESTAD (AAN): Den fin di siman largo, a keda demostra cu Aruba tin agentenan policial heroico cu danki na nan training, a sa di salba bida di un criatura!
Tabata Diabierna 18 Maart 2022 banda di 5:00 pm, net ora cu unidad di Polis di Playa ta pasando riba Lloyd G. Smith Boulevard na altura di Linear Park, un dama a core bin hala nan atencion.
El a core bisa Polis, cu eybanda mes tin un baby cu a bira hopi malo, y e no por hala rosea mes mas.
Mesora Polis a subi e parkinglot di Plaza Turismo na Linear Park, unda e baby tabata. Aki Polis a bin topa cu un grupo di hende rond di un baby. Un ciudadano tabata dunando yudanza di CPR na e baby.
Diferente biaha Polis cu voz halto a puntra si un hende eybanda ya caba a yama Ambulans. Pero ningun hende por a contesta Polis si acaso a haci esey caba of no.
Polis a mira cu e baby ta full for di tino. Relaciona cu esaki, Polis a tuma e baby over, y a pidi e mama pa core bin subi patras den unidad di Polis. E agente tambe cu e baby den man a subi sinta patras, y a cuminza practica CPR riba e criatura.
Aki ta unda cu e training di CPR cu agentenan a ricibi, tanto pa hende adulto y pa baby, ta dunando su fruto!
E agente policial sinta dilanti a pone luz blauw y sirena, y cu rapidez a sali rumbo pa Servicio di Emergencia na Dr. Horacio Oduber Hospital. Na caminda e Polis na stuur via su Tetra-Radio a pidi Central di Polis pa notifica esnan na Hospital cu nan ta rumbo eynan cu un baby cu ta for di tino, pa asina e medico y enfermeronan topa cu nan pafo.
Mientras tanto cu e Polis tras di stuur ta maniobrando den e trafico druk di Dia di Himno y Bandera, e agente policial parti patras tabata sigui cu CPR riba e baby, como cu e tabata keto bay for di tino y no tabata duna reaccion.
Pero mas cu e tabata sigui cu CPR, a bin nota cu e baby a cuminza bin bek un tiki na tino.
Ora cu Polisnan a yega na Hospital, ya caba e personal di Servicio di Emergencia tabata para pafo cla pa tuma e baby over for di man di e agente policial, y na careda a core bay paden pa asina dune tratamento mas avanza. Polisnan a pone Bureau Slachofferhulp na altura tambe pa bin duna un man.
Despues di e tratamentonan aki, e Pediatra cu a atende e mucha a declara na Polisnan cu e baby a stabiliza, pero e lo wordo hospitaliza pa mas control. No ta conoci si acaso el a pega cu cuminda, of demasiado slijm den su garganta a obstaculiza halamento di rosea. Pero e bon noticia ta cu e baby a sobrevivi, danki na e reaccion rapido di e dos agentenan policial Nuñez y Willems a sa di haci un diferencia den bida di henter un famia.
Con importante CPR ta pa un hende sa di dje! Aki na Aruba bo por haya curso di esaki pa asina amplia bo conocemento. Na Merca na varios estado, alumnonan di 13 aña di edad ta wordo obliga di haya curso di CPR durante ora di scol.
Di con ningun hende a yama Ambulans pa duna un yudanza? Tur hende ta kere cu “otro hende” lo haci esey. Siendo cu semper ta mihor cu HOPI hende yama Ambulans, envez cu NINGUN hende a yama. Djis corda cu bo tin di yama 911 pa Ambulans of Bombero, y yama 100 pa Polis.
Na final, tanto Central di Polis y Comandante na Warda a wordo notifica di loke a socede, y di e resultado positivo na final.
