Vicepresidente di SPA kier laga bon cla pa pueblo:
ORANJESTAD (AAN)—Francel Bernardus, Hoofdagent Eerste Klasse den KPA, y Vicepresidente di Sindicato di Polis (SPA), trahando na Warda di Shaba, den entrevista cu DIARIO a expresa su sentimento, como lider di SPA, di condolencia pa e famia di e hoben cu a fayece, durante un incidente cu dos agente policial.
Bernardus a referi na e amenaza cu ta circula den algun media social, unda ta mustra potret di dos polis, y e kier a laga bon cla cu e dos polisnan aki no tin nada di haber cu e situacion.
El a agrega cu Hefe di Polis ta preocupa tambe, mirando cu tur loke ta pasa rond ta fastioso, y no ta sano pa polis tampoco. “Nos tambe tin yiu, nos tin famia, y aunke nos ta polis nos tambe ta hende manera tur otro hendenan y nos ta sinti”, el a expresa.
El a declara cu e ta lamenta cu nos pueblo ta sigui boltea e cosnan, reiterando cu enfasis, cu e kier pa keda duidelijk den pueblo cu e dos polisnan cu nan potret ta circula, no tin nada di haber cu e situacion, y e amenazanan cu a cay no ta dushi pa nan ni nan famianan y tampoco pa nan coleganan.
“Nos mes cu ta coleganan no tin ni un idea di e situacion, di kico a pasa. E dos coleganan nan sa kico a pasa y nan ta bezig cu nan situacion y tin un onderzoek andando, pa nos yega na e berdad di kico a pasa”, Francel a señala.
El a señala cu tampoco pa e dos coleganan implica esaki ta facil, locual a sosode ta hopi grave, no ta facil pa ningun colega cu e hoben aki a fayece. Nan tambe mester di ayudo profesional, y sosten di nan mes coleganan.
“SPA ta para duro tambe nan tras, no cu nan ta pro cu algo malo, ora e onderzoek pasa lo tin consecuencia bon of malo pa cada hende, pero aworaki no tin nada y nos no por huzga ningun hende. Nos tey para pa nan, pa loke nan mester pa nos por yuda cu ne”, Francel Bernardus a expresa.
E ta comparti e preocupacion di Hefe di Polis pasobra den e actividadnan di carnaval cu ta sigui, tin miles di hende y algo por pasa, algo por bin.
“Nos ta hendenan cu ta kere den Dios, nos ta pidi Dios proteha nos, y cu husticia haci su trabao. Esey ta algo fastioso pasobra no tur biaha loke bo ta haci como polis, hende ta contento cu bo, pero bo tin cu haci bo trabao. Tin biaha bo ta hacie bon of ta hacie malo, pero ora onderzoek caba si bo a haci malo bo tin cu paga cu bo castigo y si bo a haci bon, ya! Pero nos mester ta mas uni cu nunca awo pa cuida lomba di otro, pasobra no tin otro manera”, Francel Bernardus a vocifera.
