Uno na Arashi y otro na Palm Beach
ORANJESTAD (AAN): E tabata un Diamars scur na Aruba! Tabata Diamars siman pasa, esta 4 di April cu dos turista a perde nan bida.
Prome caso: E prome a socede banda di 12:35 pm, cu varios unidad di Polis a ser manda na Arashi como cu lo tin un caso di hogamento eynan.
Polisnan a cuminza mobiliza pa e area, mientras cu Ambulans a wordo notifica. Ambulans a yega, y mesora paramediconan a yega na e beach unda a cuminza practica CPR pa reanima e victima masculino, kende ta un turista.
Paramediconan a haci nan best pa CPR, pero e no a duna resultado. Na final nan a pidi pa Centro di Alarma pone un Docter na altura di e caso.
Polis na nan turno a pidi presencia di Bureau Slachtofferhulp pa yuda atende e famia.
Pa 1:15 pm, Docter a constata morto di e turista di inicial P., naci na Merca. E tabata na Aruba temporalmente cu su famia, como cu nan ta abordo di e barco Carnival Horizon.
Bureau Slachtofferhulp a sigui asisti e famianan, y na final a pone Central di Polis na altura.
Di dos caso: Como dos ora despues, yamada a drenta na Polis cu na Palm Beach, riba e lama dilanti Holiday Inn Resort tambe tin hogamento. Polisnan di Noord y Strandpolitie a mobiliza pa eynan pa 3:50 pm. A topa cu security, kende a bisa cu un hende a bira malo den awa. Nan a cana bay beach y ripara cu el a wordo saca for di awa, ta drumi abao riba beach y un turista ta practicando CPR riba dje, y ta ricibi yudanza di mas miembro di security.
E prome Ambulans cu a yega, mesora a core subi beach y paramediconan a sigui cu CPR, y pone aparato pa monitor esaki.
Hendenan eynan a bisa Polis cu e turista a wordo haya ta drief boca abao den awa, y nan a core sak’e, y cuminza cu reanimacion.
Banda di 4:15 pm, Paramediconan a nota cu CPR ta yudando cu nada mas, y e turista no tin señal vital mas. A pidi Centro di Alarma pa manda Docter. Pa 5:05 pm, Dr. Texier a constata morto di e turista P. naci na Connectitut na Merca. Polis a manda busca Bureau Slachtofferhulp tambe pa yuda e famia den e momento tristo aki.
