Uno a dal bofta y e otro a hinc’e
* Pa colmo uno di nan ta homber casa
ORANJESTAD (AAN): Autoridadnan hudicial ta investigando un caso serio cu a presenta Diasabra merdia pa atardi riba tereno di Taxi Parking, specificamente na e ‘Taxi Rest-Area’ na Aeropuerto Internacional Reina Beatrix. A bin sali na cla cu dos Taxista adulto a busca guera cu otro, debi na supuesto ‘Triangulo di Amor’ cu un dama hoben di 27 aña di edad.
Na e Taxi Rest-Area na Aeropuerto, tin un gazebo special pa Taxistanan por relaha wardando nan turno, cu asiento y mesa, caminda tin biaha ta hunga Domino tambe of djis chill y combersa cu otro.
Un Taxista femenino nobo, kende ta trahando como ‘Hulpchauffeur’, a cuminsa core haci trabao alrededor di aña pasa y aparentemente a cuminsa envolvi su mes romanticamente cu un Taxista. Pero recien aparentemente e Hulpchauffeur a haci cambio y a start romance cu un otro Taxista.
Aki ta unda conflicto a start! Aunke uno di nan esposa na cas, un guera a start entre e dos Taxistanan aki. E conflicto a escala riba Diasabra atardi.
A cuminsa cu un bofta: El a escala ora cu chauffeur di TX-202 (un Toyota Prado Landcruiser) a yega furioso bao di e gazebo na Aeropuerto, y el a bay unda chauffeur di TX-442 ta sinta. Den forma sopresivo, el a zwaai su man y dal chauffeur di TX-442 cu bofta den su cara. E taxista TX-442 a bira furioso cu e bofta aki. Situacion mesora a bira tenso, y demas Taxistanan a trata di stop e duo di sigui ataca otro.
Recherche tin video caminda por mira cu chauffeur di TX-202 tambe tabatin obheto skerpi den su man. E chauffeur di TX-442 a dicidi di cana bay di eybao, pero el a acudi na su vehiculo (un Honda Odyssey minivan). El a regresa na e gazebo cu un obheto tambe den su man.
Den un movimento rapido y inespera, el a bay pa asina dal mokete y cu e otro man tabata zwaai e obheto skerpi riba curpa di TX-202, kende e ora a core hala atras, sali for di bao di e gazebo. Chauffeur di TX-442 a sigui zwaai cu esaki na su nek, schouder, y parti di abdomen. E potret aki ta mustrando e hincamento andando.
Ora cu porfin TX-202 a aleha mas leu, e otro Taxista a stop cu su atake, a manera reflexiona y a cana bay bek bao di e gazebo. Aki ta unda cu TX-202 a bin ripara cu su curpa tin herida y ta sangrando.
El a wordo aresta: Polisnan a wordo yama pa 3:55 pm, y Central di Polis mesora a manda patruyanan di Playa, como tambe unidad K9, y Grenspolitie rumbo pa eynan. Polis a yega y a nota cu Grenspolitie tey caba ta acumulando informacion. A base di esaki, Polisnan a aresta e Taxista di inicial C. di TX-442. E obheto skerpi tambe a wordo confisca.
Ambulans a yega pa asina Paramediconan a trata e otro Taxista di inicial H. di TX-202 cu a ricibi multiple hinca na su curpa. E tin un corta na su pecho banda drechi, y tambe bao di su pecho banda robez. Algun caminda ta djis un rasca el a ricibi, pues e obheto skerpi na algun lugar no a corta bay den curpa. Paramediconan a haya necesario pa bay cune rumbo Servicio di Emergencia na Dr. Horacio Oduber Hospital pa tratamento urgente.
Cu vehiculo di transporte, e Taxista C. a wordo hiba rumbo pa Warda di Strandpolitie, unda el a ser presenta dilanti Fiscal Auxiliar. Esaki a revisa e detayenan di aresto, y a tuma decision pa e detenido wordo hiba Warda di Polis na Playa, pa e wordo poni disponible na Recherche di Oranjetsad.
Siman aki, e caso aki lo bay wordo discuti sigur door di oficialnan di Departamento di Transporte Publico (DTP) kendenan por tuma medida disciplinario, of mas extremo pa cu e permiso di Taxi-vergunning cu nan tin.
Tambe lo por haya Aruba Airport Authority haci nan propio investigacion, como cu e pelea y hincamento descabeya aki a socede riba nan tereno propiedad y tin poder pa prohibi acceso na e Taxistanan envolvi tambe. Sin lubida e problema cu e Taxista lo bay confronta cune na cas cu su mesun famia.
