ORANJESTAD (AAN): Diaranson anochi laat pa 11:45 pm, yamada a drenta na Polis pa indica cu habitantenan fada di Shiribana a caba di gara un ladron cu ta cometiendo ladronicia.
Manera a ser treci dilanti caba, for di tempo cu den centro di Shiribana awor tin un cas cu ta fungi estilo Chollerhouse, unda abiertamente tin bendemento di droga ta tuma lugar, ta casi tur dia habitantenan di varios bario ta haya molester, e.o. Catiri, Tanki Leendert, Nuñe, Pavia, Modanza, Paradera, Roncado, Rooi Afo, y tambe Sero Preto.
E biaha aki ta na Modanza e caso a socede, y pa tal motibo mesora un unidad di Polis di Playa a ser manda cu urgencia.
A bin haya sa cu e ladron a kibra drenta den cas na Modanza, y ora cu doño a descubri e anti-social, mesora el a purba huy. El a ranca careda bay nort, y dos habitante tambe decidido a bay su tras.
Polis a haya update cu e dos habitantenan a gara e ladron na altura di Shiribana.
Ora cu Polis a yega den area di Rococo Plaza, nan a bin topa cu e situacion y a mira dos ciudadano. E dos ciudadanonan a identifica nan mes di inicial P. y tambe di inicial D.P. Nan a declara na e polisnan cu algun minuut prome, nan a mira riba nan Security Camera con e sospechoso di inicial K. ta den su cura dilanti cas na Modanza. Riba camera nan a mira con e ladron K. a kita su slofnan y a bisti par di zapato marca Adidas cu tabata poni dilanti porta di cas.
E ciudadano P. a sigui declara cu el a core bay dilanti, dal e porta habri y a spanta e ladron inmensamente. Consecuentemente e ladron K. a core bay direccion Shiribana.
E ladron K. a sinti cayente y na caminda a zwaai e zapatonan banda di caminda y el a keda sigui core. Pero e ciudadanonan tin mihor condicion fisico, y facilmente P. y D. a yega na dje y a gare tene.
Polis a nota cu debi na e luchamento, e ladron tabatin herida na orea banda robez y man drechi cu ta sangra un poco.
Ni cinco minuut despues a presenta e dama di inicial C., kende tabatin e zapatonan di Adidas den su man, cu el a haya benta banda di caminda. E dama a bisa cu e ta un turista hospedando aworaki na un Airbnb, y cu e ta doño di e zapatonan ey.
A base di loke a wordo constata, Polis a detene e ladron di inicial K. pa a viola articulo 2:288 di Codigo Penal di Aruba, cq articulo 2:289.
Polis a listra e paña di e ladron, pero no a haya nada den su poder.
Cu vehiculo special el a wordo transporta pa Warda di Polis, unda Fiscal Auxiliar a atende. El a duna ordo pa 12:25 am, pa encarcela e ladron aki na Warda di Polis na Noord, pa asina investigacion wordo haci.
Pues pa e proximo dianan aki, e area di Shiribana y vecindario por hala un tiki mas rosea trankil.
