ORANJESTAD (AAN): Den oranan di atardi informacionnan a cuminsa drenta di un posible caso di hogamento den area entre Andicuri y Natural Bridge.
A resulta cu dos persona cu tabata forma parti di un grupo cu tabata disfruta di un tour cu UTV a cay den awa.
Di biaha e personanan aki a bati alarma. Autoridad y demas departamentonan concerni entre nan Polis, Brandweer, Ambulans y materiaalwagen a mobilisa pa e sitio.
A logra saca un di e victimanan for di awa y a cuminsa dun'e prome auxilio, pero aparentemente esaki tabata mucho laat y e victima a fayece.
Pa motibo di e forza di olanan, e otro persona tabata wantando pa su bida na e baracanan.
Na momento cu ambulans a yega, e paramediconan tambe a purba di reanima e victima riba beach, pero sin exito.
Slachtofferhulp tambe a presenta na e sitio pa duna asistencia na e turistanan cu tabata forma parti di e grupo. DIARIO ta expresa palabranan di sentido pesame na e famia y conocirnan.
