Unit Narcotica enfocando riba importadornan tambe
- Awor Big Fish tambe ta wordo vigila
- Autoridad a haya hopi placa cash tambe
ORANJESTAD (AAN): E focus no ta djis dirigi riba e ‘rebendedornan chikito’, pero hecho ta cu ora bo gara e dealernan cu ta bende tiki weed of sakito di cocaina for di nan garashi na cas, ora cu nan cay cera, algun di nan ta djis cuminsa papia pio cu prikichi.
Esaki ta pone cu awor autoridad ta dedicando nan mes extensivamente pa purba di gara tur ‘big fish’ cu ta keda importa droga riba e isla cu ta responsable pa kibra hopi famia riba e isla ora cu hendenan cu mente debil of cu no ta razona facil, y ta cay pa drogadiccion.
Diabierna 15 di September, ya for di den oranan di marduga, e asina yama departamento di ‘Unit Narcotica’ di Polis tabata riba pia enconexion cu un otro investigacion grandi. Ta trata di un investigacion unda cu delincuentenan a kere cu nan por trece droga Aruba, bende esaki y burla di nos Husticia pero aki ta unda cu nan a faya!
For di oranan di merdia a haci un razzia inespera na un cas na Caya Soeur Nicephora, cu ta keda como 140 meter panort di e pista di Bushiri Carting. Durante e entrada hudicial na e adres ey, bao ordo di fiscal a detene e homber N.J.R.M di 24 aña di edad naci na Aruba.
E investigacion a continua y den oranan di anochi a haci un otro razzia na un cas na Bubali na unda a detene e homber M.P.T.T di 26 aña di edad naci na Aruba.
Durante di e entrada hudicial na Bubali a bin topa un cantidad grandi di droga y placa cu a keda confisca pa mas investigacion. Vocero policial Liliana Rasmijn a confirma cu a haya hopi droga, y tambe placa cash, incluyendo papel di Dollars. A haya varios paki di droga tambe ainda sella den nan paki, y uno di nan tin e emblema di Popeye riba dje. Segun e vocero, no ta descarta cu lo tin mas detencion ta cay pronto.
Manera ta conoci, Unit Narcotica ta un unidad di Cuerpo Policial Aruba cu oficialmente a worde lanta 1 augustus 2023. E unidad ta investiga tur loke ta bendemento di droga for di casnan, ariba caya, delivery, plataforma social y hasta area di hotelnan. Tambe e unidad ta investiga tur droga cu worde intercepta pa Douane, US Customs na aeropuerto, door di ambtenaarnan di KIA y tambe tur droga encontra durante cualkier control policial.
Pa Cuerpo Policial Aruba por resolve mas caso cooperacion y informacion di pueblo di Aruba ta hopi importante, pesey nan ta pidi si bo tin cualkier informacion yama nan Tipline di Polis cu ta 111-41. Nan ta garantisa cu bo ta keda anonimo.
