Caso na Noord
ORANJESTAD (AAN): Tabata Diasabra madruga banda di 4:55 am, e unidad di Polis di Noord cu a bay check kico ta pasando na altura di Lekker Bar & Restaurant na Noord, a core pidi refuerzo di mas unidad di Polis.
Polis a haya informacion cu tin un pelea grandi andando. Diferente unidad mesora a mobiliza rumbo pa Noord pa bay duna un man na Lekker Bar & Restaurant.
Tambe a haya informacion cu un di e sospechosonan meti den e bringamento lo a bandona e lugar.
E unidad di Playa cu ta na caminda pa eynan, diripiente a bin topa cu un Hyundai Accent ta coriendo sin luz cendi. Polis a core bira y bay pa duna e chauffeur un señal pa e stop. E chauffeur a cumpli cu e ordo, y a para su vehiculo na altura di Palm Beach.
Ora cu Polis a yega cerca di e auto, tur dos agente a haya holor masha fuerte mes di alcohol y tambe droga ta sali di e vehiculo, of for di e aliento di e chauffeur.
Nan a pidi pa mira su rijbewijs, pero e no tabatin esaki pa duna nan. Polis a dune ordo pa baha di e vehiculo, y el a duna OK pa revisa e auto.
Riba e asiento patras di e Hyundai Accent aki a haya un rugtas preto cu tabata habri. Den e tas aki Polis a bin haya un cantidad masha grandi mes di marihuana y cocaina, cualnan ta poni den diferente saco, y tambe sakito transparente. Tabatin como 5,50 Florin na placa larga tambe den e Tas.
Polis a sigui controla y den e Middleconsole di e Hyundai, a bin haya como 83 Dollar cash, y tambe 16,95 Florin cash. Ora cu a listre, a bin haya un Smartphone color cora, y tambe a haya 712 Dollar cash, y 167 Florin cash mas.
A bin haya sa cu e chauffeur ta di inicial I.J., y a base di tur esaki, nan a detene pasobra el a viola Articulo 3 y Articulo 4 di Ley di Droga, y tambe Articulo 10 y 21 di Ley di Trafico.
Cu vehiculo special el a wordo transporta pa Warda di Polis na Shaba, unda el a ser presenta dilanti un Fiscal Auxiliar. Esaki a duna ordo mesora pa e wordo encarcela pa e saca su wayaba, y pa e serie di interogacion cu Autoridadnan Anti-Droga di UGC lo bay haci riba dje.
Tur droga, hunto cu e smartphone y e placa cash a wordo confisca, y awor Ministerio Publico tin un big fish aki pa interoga y por lo pronto lo keda basta tempo encarcela.
