ORANJESTAD (AAN): Cuerpo Policial ta pidi ayudo di comunidad den buskeda di e hoben Susette Perez Martinus, naci na Colombia y di 17 aña.
Dia 7 November Susette tabata cu permit di JJIC/GOG na cas hunto cu su mama. Dos homber a presenta na e cas y bao di menasa cu arma di candela a bay cu e hoben contra su boluntad. Despues di e acto e homber a bay for di lugar den un auto color blanco. For di e momento ey e mama no tin contacto mas cune ni tampoco sa su paradero.
Susette tin un statura di 1.75 meter, postura normal, color di cuero ta bruin cla; su cabey ta crul colo bruin; y su color di wowo tambe ta bruin.
Polis a haci un suplica na tur hende cu por duna cualkier informacion tocante di Susette pa tuma contacto cu polis na number di Telefoon 917, e number anonimo 108 of e Team encarga cu e investigacion na 670074.
Alaves kier recorda cu yuda sconde un persona cu ta wordo busca pa autoridad of tene e persona aki scondi ta un acto castigable pa ley.
