ORANJESTAD (AAN): Diamars a habri cu e decision tuma door di Corte Superior pa Aruba, Curaçao y St. Maarten (yama tambe “Hof”) riba un asunto cu a dura basta prome cu el a wordo pronuncia hudicialmente.
Semper tabata asina, cu conforme legislacion di Aruba y Curaçao, unicamente parehanan di sexo diferente por casa cu otro.
Pero riba Diamars 6 di December 2022, Corte Comun a dicta dos sentencia, un di nan den un caso di Aruba y otro den un caso di Curaçao, a base di
cua parehanan di mesun sexo lo por casa cu otro den e dos paisnan aki den Reino.
Na Aruba ta trata di un caso cu Fundacion Orguyo Aruba y dos hende muhe a entama contra Pais Aruba. Na Curaçao ta trata di un caso cu Human Rights Caribbean Foundation y dos hende muhe a entama contra Pais Curaçao. E decision di Hof a wordo transmiti via live-feed pa Aruba.
Corte a distingui e siguiente tres preguntanan: 1. Exclusion di matrimonio pa personanan di mesun sexo ta en pugna cu e tratadonan di derecho humano? Corte su contesta riba e pregunta aki ta negativo. 2. Exclusion di matrimonio pa personanan di mesun sexo ta en pugna cu e Areglonan di Estado di Aruba y Curaçao? Corte su contesta riba e pregunta aki ta afirmativo pa ambos pais. 3. Ta cay bao di e tarea formativo di derecho di Huez pa habri matrimonio pa parehanan di mesun sexo? Corte su contesta riba e pregunta aki tambe ta afirmativo.
Corte Europeo pa Derecho Humano na varios ocasion a dicidi cu e Tratado Europeo di Derecho Humano (Tratado Europeo pa Proteccion di Derechonan Humano y Libertadnan Fundamental) ta permiti cu paisnan ta stipula cu unicamente parehanan di sexo diferente por casa cu otro. Corte Comun no ta considera su mes liber pa huzga di otro manera cu Corte Europeo a haci pa cu esaki. Ta crucial den e consideracionnan di Corte Europeo cu e Tratado Europeo ta inclui un disposicion den cua ta hancra e matromonio tradicional entre personanan di sexo diferente.
Corte Europeo a husga cu mester aplica e prohibicion di discriminacion contene den e Tratado Europeo den estrecho coherencia cu e disposicion aki.
E falta den areglo di estado: Sinembargo, ni e Areglo di Estado di Aruba ni e Areglo di Estado di Curaçao ta inclui un disposicion asina tocante di matrimonio tradicional. Ambos Areglo sí ta inclui un prohibicion di discriminacion.
Corte ta conclui cu exclusion di matrimonio pa personanan di mesun sexo ta en pugna cu e prohibicion di discriminacion aki. Pa tal motibo, Corte ta declara cu ta conforme derecho cu disposicionnan di legislacion di Aruba y Curaçao lo no ta aplicable, asina leu cu semehante aplicacion lo exclui e matrimonio entre dos persona di mesun sexo. Corte ta considera cu e decision aki ta cay bao di su tareanan como juez. Den e caso di Curaçao, Corte ademas ta observa cu ta viola e tratadonan di derecho humano y e Areglo di Estado di Curaçao, pa motibo cu no a implementa e opcion di pareha registra (geregistreerd partnerschap).
Por lo demas, Corte a dicidi cu e sentencianan di Diamars mainta no tin consecuencia pa e reglamento di adopcion.
En conexion cu esey, Corte a considera cu e acceso na adopcion pa parehanan di e mesun sexo mester worde debati prome, preferiblemente tambe den Staten. No ta habri matrimonio pa parehanan di mesun sexo na Aruba y Curaçao di inmediato. Mester warda prome si e partidonan recuri na casacion, y si ta asina, kico Corte Supremo na Den Haag ta dicidi.
Esnan cu kier lesa e sentencia completo di e caso aki, por bay riba internet na e adres:
www.bit.ly/hof_mesunsexo
Mesora un cantidad di hende rond di Aruba a expresa riba social media, nan satisfaccion y alivio cu porfin e isla ta cumpliendo cu respet pa derechonan humano.
