Alto Comisario Ramon Arnhem:
ORANJESTAD (AAN): Tur hende tin derecho riba bon cuido. Pa por brinda e asistencia necesario den situacionnan imprevisto, ta esencial cu miembronan di Cuerpo Policial di Aruba por eherce nan trabao cu siguridad y sa con pa actua. Esaki ta conta tambe ora nan ta atende personanan den un crisis di salud mental, segun Alto Comisario di Cuerpo Policial di Aruba, Sr. Ramon Arnhem, a expresa den un entrevista cu DIARIO.
Segun Arnhem, claridad tocante e manera di actua y e responsabilidadnan di cada instancia ta brinda mas trankilidad na e funcionarionan cu mester interveni.
Dia 3 di november 2026, FSMA Respaldo, Cuerpo Policial di Aruba (KPA) y e servicio di ambulans di ImSan a firma un convenio pa fortalece nan cooperacion den situacionnan cu ta involvi personanan cu problemanan di salud mental of comportacion dificil pa compronde. E acuerdo ta establece e responsabilidadnan di cada organizacion y ta facilita coordinacion pa proteha tanto e persona involvi como e funcionarionan y e comunidad.
Arnhem a indica cu e convenio a drenta na vigor mesora despues di su firmamento. Sinembargo, el a subraya cu esaki ta un prome paso. E instancianan lo mester sigui traha hunto pa desaroya e cooperacion y concreta e palabracionnan den proceduranan cla. Segun e Alto Comisario, e proceso aki lo tuma tempo.
Tambe el a resalta e importancia di cooperacion di famianan. Ora polis mester interveni den un situacion cu ta involvi un persona cu problemanan psikiatrico, informacion relevante di su famia por yuda e funcionarionan compronde miho e circunstancianan y prepara pa loke nan por encontra.
Pa finalisa, Arnhem a elogia e esfuersonan di Cuerpo Policial y SPA pa logra e convenio. El a indica cu nan lo sigui dedica atencion na e desaroyo y profesionalisacion di e cooperacion aki.
