Shon Pe cu mensahe pa polisnan hoben:
ORANJESTAD (AAN) – Shon Pe Krozendijk, pensionado di Cuerpo Policial (KPA), tambe a expresa, den entrevista cu DIARIO, un conseho pa e generacion nobo di KPA.
E veterano di Polis, kende den pasado tabata Vocero Policial, a declara esaki durante e momento di entrega di patruyanan nobo di Polis, na Warda di Polis den Paardenbaaistraat.
“Sea bo mes den tur circunstancia, no laga ningun hende balia bo, pero asina hende ta. E amigonan rond di bo, bo mester wak ken nan ta, mi no por ta amigo di tur hende, como polis,” el a declara.
El a bisa: “Mi a traha 50 aña pa Aruba pero 28 aña como polis, y mi no ta bisa bo cu bo mester ta arogante; pero bo mester ta humilde den bida, sin laga hende subi na bo cabes, como polis bo no por ta amigo di tur hende”, Shon Pe a reitera.
“Esey ta locual polisnan hoben mester tene na cuenta, ora bo ta haci esey bo ta planta respet, y ora bo planta respet bo ta haya respet bek”, Shon Pe a acentua.
Cuerpo Policial awor tin patruyanan di Ford Everest, cu ta un tipo di SUV. Tambe tin unidadnan di Ford Ranger, cu ta un tipo di pickup.
