ORANJESTAD (AAN): Un atraco basta violento a keda registra Diamars anochi den area di Emmastraat den cercania di e tereno di Aruba Juniors na Playa.
Dos dama canando riba acera inespera a haya nan cu dos atracador nan dilanti.
Di comienzo caba a nota cu e hobennan aki tin intencion criminal, y diripiente na un forma violento, nan a rek y ranca di cada uno, e cadena di oro cu nan tabatin rond di nan garganta. E rekmeto aki a pone cu e cadenanan a kibra, y a causa dolor na e damanan.
Despues di esaki, e dos atracadornan a core drenta den un auto sedan Nissan Teana color shinishi cu stuurwiel na banda drechi, y a huy di e lugar. E damanan mesora a core yama Polis pa haci denuncia.
Central di Polis a core manda patruyanan di Playa rumbo pa eynan. E prome unidad cu a yega cerca e dos damanan, a topa nan ainda basta spanta pero e bon ta cu nan a duna suficiente informacion di e atracadornan, incluyendo bon detaye di e auto sedan cu nan a huy den dje. A splica Polis cu e atracadornan aki ta dos persona basta hoben.
Polis a cuminza core den henter e vecindario aki, y un rato despues a topa cu e auto den Venezuelastraat y mesora Polis a stop nan. Nan a pone ambos hoben hands-up, y a logra pone boei den nan man. A trece e dos victimanan na e lugar, y nan a reconoce e hobennan como e atracadornan.
Cu Vehiculo di Transporte a hiba e hobennan pa Warda di Polis, y den e Nissan Teana a bin haya un arma di candela poni den baul. Team forensico di BFTO a wordo envolvi, y un investigacion ta sigui. Lo bay check ta den cuanto caso mas di atraco e hobennan aki ta envolvi.
