Atake sin motibo na Palm Beach
ORANJESTAD (AAN): Diadomingo marduga net despues cu mey anochi a caba di drenta, cu Polis di Noord a ser manda na altura di parkinglot di McDonald’s relaciona cu un caso di hincamento.
Ora cu Polis a yega, e agentenan a bin topa cu un ciudadano benta abao na suela. E homber despues a resulta di ta di inicial C.
Polis a papia cu un señora eybanda di inicial G. El a splica cu nan a caba di sali for di Kalibra y tabata canando rumbo pa nan auto. E persona C. a dicidi di acompaña nan e ora laat ey, pa asina ta sigur cu nan ta yega safe na nan auto.
Net na e Drive-Thru di McDonald’s tabatin dos hoben papiando cu otro. Ora cu nan a pasa banda di e hobennan, e duo aki a cuminsa cana nan tras. E momento ey e señora a cuminsa sinti e situacion raro, pero a sigui cana rumbo pa nan auto.
Riba e parkinglot di McDonald’s tabatin mas hoben cu ta pertenece na e grupo di e dos hobennan prome. Un di e hobennan cu tabata na e Drive-Thru a grita algo na e grupo.
Na e momento ey e grupo di hobennan a rondona nan. Un di e hobennan a ataca e dama. Na e momento ey, C. a yega cerca pa defende e dama. Pero e grupo a ataca e ciudadano tambe. Nan a dal e ciudadano, a yena su curpa cu scop, y un di e hobennan a bin dal’e cu un machete na su frenta y na boca. Despues nan tur a sali core bay.
Pero dos a bin bek cu un cuchiu chikito. E dos hobennan a trata di intimida e señora pa start un problema. Despues nan a drenta den un Toyota Vitz y un otro auto, y a bandona e parkinglot.
Ambulans a yega eynan, y nan a duna tratamento na e ciudadano C. Sinembargo a opta pa bay cune Servicio di Emergencia na Hospital pa mas tratamento medico.
Polis tin e caso bao investigacion.
