Sharline Koolman:
ORANJESTAD (AAN)/Den Haag – Den un combersacion cu Minister Plenipotenciario mr. Ady Thijsen tabata tin cu Sharline Koolman di Ministerio di Husticia y Asuntonan Social a papia riba e tema di GGZ (Geestelijk Gezondheidszorg) na Aruba.
Esaki den e bista cu Minister di Husticia Rocco Tjon den su plan pa bin cu un prizon nobo, tambe ta sondea e posibilidad pa banda di e prizon bin cu un Clinica di TBS. Mirando cu e aspecto di GGZ ta hopi importante pa Minister Tjon, ya caba a haci un bishita di trabao na un clinica TBS na Venray, De Rooyse Wissel.
Sra. Koolman a bisa cu den e plan cu Aruba tin a pensa di bin cu un centro parti den dos: un parti pa adulto y un otro parti pa hobennan.
Durante e combersacion a bin un punto importante dilanti, cu un centro di TBS ta exigi personal cualifica. Pesey ya caba lo mester busca scolnan cu cuminsa educa personal. Mester por mira con EPI por yuda den esaki, pero tambe busca maneranan pafor di Aruba. Tin contacto cu ROC Venray cu lo por brinda educacion. Un estudio asina ta dura 1 pa 2 aña. Lo mester personal tanto riba nivel di MBO como HBO.
Minister Thijsen a gradici sra. Koolman pa e update aki y a bisa cu Arubahuis tey pa yuda facilita procesonan na Hulanda cu por contribui na e proyecto aki.
E potret ta cortesia di Arubahuis
