ORANJESTAD (AAN): Minister di Husticia Rocco Tjon a reuni cu Procurador General Bote Ter Steege, caminda a toca varios punton,
entre otro e maneho sostenibel pa loke ta combati corupcion na Aruba, e cuido forensico pa loke ta trata KIA y por ultimo regulacionnan den cuadro di abuso sexual.
For di Ministerio di Husticia a vocifera na diferente ocasion cu no lo corta den e “wenselijkheid begroting” di instancianan cu ta enfoka nan mes den combati corupcion, por ehempel Ministerio Publico y LandsRecherche. Segun Minister Tjon, actualmente tin un concepto riba mesa. Aki ta trata di un plan di maneho caminda tur instancianan concerni a duna comentario riba dje cu e meta final pa yega na un unidad dedica na combati corupcion. E unidad aki lo worde instala cerca Ministerio Publico bou di autoridad di Ministerio Publico di Aruba y lo bay tin su propio fiscal como tambe su propio ekipo huridico, pa asina por tin un unidad dedica unicamente na e tema aki.
A toca e topico di KIA, caminda un di e visionnan ta pa percura pa yega na un instituto cu por brinda un bon cuido na hobennan como tambe esnan cu tin mester di e cuido forensico. E meta di esaki ta pa zorg di por baha recidivismo pa asina percura cu resocialisacion y reintegracion por ta un exito.
Por ultimo a toca e topico di abuso sexual, caminda dentro di poco lo bay tin regulacionnan nobo pa loke ta e problematica di abuso sexual na Aruba. Den cuadro di esaki “beleidsvoornemens” nan di Ministerio lo inverti den e departamentonan pa asina por pone mas enfoke riba e parti di prevencion pero tambe riba e parti di investigacionnan cu ta worde haci, pa esakinan por ta uno mas solido.
