Abogado mr. Oomen den apelacion caso Avestruz
ORANJESTAD (AAN): Abogado mr. Oomen representando Werleman y Nuñez a hiba su defensa Diamars mainta hopi extenso den e apelacion caso Avestruz.
E abogado a bisa Hof cu Werleman y Nuñez a worde declara liber pa Hues di Corte den Promer Instancia pa falsificacion y complice di actonan haci door di Sevinger y Abath.
El a mustra cu Procurador General (PG) den su requisitorio kier hinca Werleman y Nuñez den un tunel sin salida pero esey no ta asina. No ta asina cu manera PG ta bisa cu Werleman y Nuñez a haya tereno facil di Sevinger. Mr. Oomen a mustra cu a duna 2 aña promer cu Werleman y Nuñez a haya tereno erfpacht commercial pa Damira. Tampoco ta asina manera PG ta bisa cu Werleman y Nuñez a gaña y malversa Gobierno.
Con a yega na tereno pa proyecto Damira: E abogado a bisa Hof cu awor ta casi 10 aña pasa cu Damira a pidi tereno. El a mustra cu door di e crisis economico mundial, Gobierno a cuminsa cu maneho di stimula economia door di ofrece tereno comercial.
Na December 2014, Damira a haci peticion pa tereno pa traha 15 apartamento. mr. Oomen a mustra cu den sentencia 14 April 2023, Hues di Corte den Promer Instancia ta bisa cu den e tempo cortico cu Werleman y Nuñez a haci peticion di tereno comercial, a bay activo pa busca comprador pa e tereno. E abogado a bisa cu esey no ta corecto. El a mustra cu 7 April 2015 Damira a haya opcion pa 2 pida tereno algo mas cu 4 mil meter. No ta asina cu a bay busca cumprador di biaha. Despues cu a haya opcion pa 4 mil meter na April 2015, cu ta mas cu e 3 mil meter cu a pidi, Werleman y Nuñez a dicidi di busca otro inversionista pa por realisa e proyecto di apartamentonan pa turista.
Cuestiona sentencia: Abogado mr. Oomen ta haya cu inhustamente Hues di Corte den Promer Instancia ta bisa cu den tempo cortico a busca cumpradornan di Damira.
Abogado a mustra cu ta door di intermediacion di Henriquez di Spacio, clientenan a haya Donadi, kende kier a cumpra henter e proyecto.
Confundi Deshaun NV cu Damira: Tambe abogado ta haya cu inhusto Hues di Promer Instancia ta bisa cu Damira no tabatin capital pa haci proyecto. E ta kere cu Hues a bruha Damira cu Deshaun.
E abogado a mustra cu Damira tabatin capital pa realiza e proyecto di 15 apartamento pero door cu a haya un tereno mucho mas grandi cu a pidi, a dicidi di busca inversionista pa haci un proyecto mas grandi.
Por busca accionista pa proyecto: Abogado mr. Oomen a mustra cu tin sentencia di Corte Superior di 2001 riba e caso Mar Azul cu ta mustra cu no ta necesario cu e accionista ta keda cu e proyecto ora ta duna tereno erfpacht comercial. E proyecto por worde cumpra door di otro accionista(nan).
E abogado a mustra cu durante interogacion na Hues Comisario tin funcionario di DIP a bisa cu no ta mira kende(nan) ta accionista sino si e compania ta inscribi na Camara di Comercio. El a bisa cu na 2016 e acta notarial pa pasa e tereno a keda cla. E notario Johnson a declara cu e no ta conoci cu tin un condicion pa haya tereno cu ta bisa cu no por cambia accionista promer cu haya e tereno.
Pakico no a persigui e otro accionistanan di Damira: mr. Oomen a bisa Hof cu su clientenan no a gaña Gobierno y no por a gaña Gobierno. E abogado a mustra cu e accionista den Damira, Henriquez a haya 500 mil Florin den e proceso di bende accionnan y e no ta worde persigui. Un otro accionista Osorio, a haya 100 mil Florin y tampoco ta worde persigui.
E abogado ta haya cu PG mester persigui Henriquez y Osorio pa no informa Gobierno di a bende nan accion di Damira. E abogado ta haya cu aki no ta aplica principio di igualdad.
Persecusion politico: Na opinion di mr. Oomen, ta parce cu ta persigui solamente esnan liga cu un partido politico. El a señala cu un tereno banda di Damira, Spacio pa kende Henriquez ta traha, a bende esaki pa 6 Miyon. E abogado ta haya cu Damira no a haci un acto castigabel y te ainda tin e tereno.
- Oomen a bisa Hof cu e ta haya cu mester declara PG no admisible den nan persecusion. Mr. Oomen a mustra cu di acuerdo cu reglanan di DIP, te ainda si Damira no ta cumpli cu reglanan stipula, e por perde e tereno erfpacht comercial.
No a malversa ni gaña gobierno: mr. Oomen a bisa Hof cu su clientenan tabatin intension serio pa realiza proyecto Damira. Nan a confia den nan abogadonan y notario cu a regla tur e documentonan. Ta door di e grandura di tereno, cu ta mas grandi cu loke a pidi, a busca accionista pa yuda inverti.
E accionista, Donadi, a haci oferta pa cumpra henter Damira y esey a sosode. E abogado no ta haya cu clientenan ta culpable di cosnan contra ley.
E abogado a bisa Hof cu segun decision di Corte Supremo, mester por tin un forma di gaña hopi serio pa papia di a malversa. Den caso Damira, no tin falsificacion y tampoco a gaña Gobierno.
E abogado a bisa cu ningun di e documentonan di e proyecto por usa pa mustra cu a gaña. E documentonan ta duna tur informacion corecto y no ta falso. Mr. Oomen ta haya cu aki mester declara clientenan liber. El a bisa cu clientenan a pidi Gobierno permiso pa a bende e accionnan di e proyecto Damira y a haya permiso pa haci esaki.
