Un tabatin 17 aña y e otro 18 aña
*Nan ta culpabel di intento di mata
ORANJESTAD (AAN): Diabierna mainta e hobennan A.C.R. di 18 aña, y J.A.S. di 17 aña a scucha Hues bisa cu nan ta culpabel di intento di mata riba 8 September 2024. Hues ta haya cu A.C.R. y J.A.S., den un Nissan March, a persigui un auto Toyota den cual tabata e hombernan H. y F. y na dado momento a los tiro riba e auto. E auto a sufri impactonan di bala pero H. y F. no a resulta herida.
Fiscal: Dia 16 Mei 2025, tratamento di e caso a tuma lugar caminda Fiscal a bisa cu 5 pa 6 biaha J.A.S. y A.C.R. a tira riba e auto. Danki Dios cu no tabatin hopi hende riba caminda. Na opinion di Fiscal, e por a resulta hopi fatal. Bon mes cu ningun hende a resulta herida na San Nicolas.
Fiscal ta haya cu esaki ta un caso hopi serio di tiramento den San Nicolas. Ta trata di dos hoben J.A.S. y A.C.R. Nan ta ‘conoci’ di Polis pa cosnan cu nan a yega di haci. Fiscal ta haya cu nan mester haya guia intensivo di Reclassering. Pa J.A.S., Fiscal a exigi castigo hubenil di 3 aña di prison di cual 1 aña ta condicional cu un tempo di prueba di 2 aña y bou guia di Reclassering. Fiscal a exigi e mesun castigo pa A.C.R.
Sentencia: Diabierna mainta Hues a bisa cu e ta haya legalmente proba cu J.A.S. y A.C.R. ta culpabel di intento di mata door di a tira riba un auto den cual tabatin 2 persona. Tambe Hues ta haya proba cu J.A.S. y A.C.R. tabatin un arma di candela y bala. Hues a bisa cu e duo aki a causa daño riba dos auto door di a tira. Hues a mustra cu ambos acusado ta nenga di tabata na San Nicolas y a tira. Nan a bisa cu nan tabata na cas. Hues a bisa cu e no ta kere nan.
Hues a mustra cu investigacion di Polis ta mustra cu e GPS di e auto March ta mustra cu e auto tabata na South Beach caminda e duo tabatin un problema cu e hombernan H. y F. Na dado momento H., cu un machete den man, a kibra e windshield patras di e March. Despues nan a bay for di eynan. J.A.S. y A.C.R. a bay den e March y tabata core ariba abao na San Nicolas. Ta obvio cu nan tabata busca e auto Toyota den cual H. y F. tabata.
Nan a persigui e auto Toyota y via camera di seguridad a mira cu a tira riba e auto. Hues a mustra cu segun declaracion di H. y F. den e auto Toyota, nan tabatin problema na South Beach y cu A.C.R. y J.A.S. a tira riba nan. Hues a bisa cu for di video no por saca afor kende a tira pero cu A.C.R. y J.A.S. tabata den e auto March.
Castigo: Pa cu e castigo, Hues a bisa cu e ta tene cuenta cu riba caminda publico, e duo a tira riba un auto. Bon mes cu H. y F. no a resulta herida. E incidente a tuma lugar den un caya caminda tin casnan cu hendenan ta biba.
Na opinion di Hues, hechonan asina ta causa sentido di inseguridad den comunidad. Hues a mustra cu posecion di arma ta crea situacionnan hopi peligroso. El a tuma J.A.S. y A.C.R. na malo pa loke nan haci. Hues a sigui bisa cu tambe e ta tene cuenta cu e raport di Reclassering cu ta mustra cu e chens cu e duo ta bolbe ripiti algo asina ta halto y cu nan mester di guia. Hues a tene cuenta tambe cu J.A.S. ta menor di edad y cu ambos ta hoben.
Hues a condena J.A.S. na castigo hubenil di 3 aña di prizon di cual 1 aña ta condicional. Durante e 3 aña di prueba, J.A.S. ta cay bao guia di Reclassering. Hues a condena A.C.R. na mesun castigo cu J.A.S.
