Vice Presidente Hof:
*A atrae un huez extra pa yuda den esaki
ORANJESTAD (AAN): Durante un conferencia virtual di Hof na corte di husticia Diaranzon, vice presidente di Hof Jacques Keltjens a papia riba e cifranan pa loke ta e casonan cu a wordo trata na corte na 2021, en comparacion cu 2020.
Ta papia aki di ‘uitstroom’ y ‘instroom’.
Uitstroom ta cuanto caso a wordo trata y a keda cla, mientras cu e instroom ta e cantidad nobo di caso cu a drenta na corte y mester wordo trata.
Keltjens a bisa cu ideal ta ora cu e instroom y e uitstroom ta cerca di ta igual na otro.
“E bon noticia ta cu e cantidad di caso cu a yega corte (instroom) na Aruba a aumenta bastante na 2021, compara cu na 2020”.
Pa Hof completo esaki tabata un aumento di alrededor di 19%, pero pa Aruba specificamente ta papia di 20.1%.,
Sinembargo, e cantidad di caso cu a keda trata (uitstroom) a aumenta cu apenas 14.5%.
Esaki segun e vice presidente di Hof, kende a indica cu mirando esaki por saca e conclusion cu a keda cla cu tratamento di 5.6% caso menos na 2021, cu locual a drenta.
“Mi mester bisa cu esaki ta representa tur caso cu drenta corte, esta casonan leve te cu casonan pisa”.
Ta importante pa conclui pues cu na Aruba na 2021 e uitstroom tabata menos cu e instroom.
Na Corsow esaki tabata diferente, esta tabata tin mas caso trata, compara cu e cantidad di caso nobo cu a drenta.
Mi ta preocupa pa loke ta esaki pa Aruba.
Specialmente e hecho cu menos caso civil ta wordo trata compara cu e casonan nobo cu ta drenta, ta algo preocupante, segun Keltjens, kende a indica cu e retrazo ta di 80 caso.
E presidente di Hof a indica cu a cuminza haci algo al respecto caba, mirando cu corte di Aruba a atrae un extra huez na Februari di 2022.
“Nos ta spera cu esaki lo yuda caba cu e retrazo den tratamento di casonan”, segun Keltjens.
contrata
