Den caso di abuso di mucha muher menor di edad
ORANJESTAD (AAN): Recientemente den Corte di Husticia a atende e caso penal cu Ministerio Publico a cuminsa contra e homber B.(35), kende ta wordo acusa di a abusa di un mucha muher menor di edad.
E caso a bin dilanti pro forma, esta cu tratamento di e caso lo no tuma lugar, solamente Fiscal a presenta e acusacion y a palabra fecha pa tratamento di e caso.
ABUSA DI MUCHA MENOR DI EDAD
Fiscal a acusa B. cu entre 2019 y 2020, el a abusa di un mucha muher menor di edad. Fiscal a bisa Hues cu ainda e procesverbaal oficial no ta cla.
El a pidi Hues pa pospone e caso pa Augustus 2023 pero un biaha mas pro forma pa e ora ey dicidi un fecha. Hues a bisa cu 31 Augustus 2023, lo por haci esey.
ABOGADO LO KIER SCUCHA TESTIGO
Abogado mr. Emerencia a bisa Hues cu door cu e no a haya procesverbaal ainda e no tin peticion. E abogado a bisa, cu lo por spera cu e lo pidi pa scucha mas persona como testigo.
SCUCHA SOSPECHOSO DILANTI HUES COMISARIO
E abogado a sigui bisa Hues cu e tambe kier pa scucha su cliente B. dilanti Hues Comisario. El a bisa cu dia 31 Augustus 2023, e lo bay bin cu mas detaya pasobra ainda e kier haya e procesverbaal.
Hues a bisa cu no ta normal pa scucha B. na Hues Comisario. Hues ta haya cu por haci esey den Corte mes ora cu Hues ta trata e caso. Fiscal a bisa cu por laga B. haci un otro declaracion na KZP. Abogado a reacciona riba e proposicion di Fiscal, bisando cu B. no kier declara na Polis. Hues a bisa cu dia 31 Augustus 2023 lo evalua tur esaki. Hues a bisa cu e ta haya cu lo ta bon pa tin un raport di Reclassering den e caso aki.
