E ruman muher di e victima a puntra pakico mester a hinca su ruman
ORANJESTAD (AAN): Dialuna mainta e homber Venezolano O.M.D. (40) a presenta dilanti Hues. Ta asina cu O.M.D. no solamente ta worde sospecha cu riba 18 Februari 2019, a hinca e homber B. seriamente cu cuchiu na su abdomen, sino tambe cu e ta envolvi den importacion di bultonan di droga na Vader Piet. Den e articulo aki, ta concentra riba e caso di hincamento. Den un otro articulo ta publica riba e caso di droga.
Hinca a bora tripa y ader: Hues a bisa cu dia 18 Februari 2019, tabatin un hincamento na De Olde Molen. Polis a haya e homber B. drumi abao tur na sanger cu hinca den custia robez. Un hende tabata primi riba e hinca pa stop e sangramento.
A resulta cu tripa di B. a keda performa y tambe un ader mayor. E lamentable incidente aki a sosode despues di carnaval, caminda e victima B. tabata cu algun amigo na De Olde Molen. Ta asina cu O.M.D. tabata traha den un restaurant banda e lugar aki, esta “Ranch”.
Testigonan a bisa cu ta e koki di e restaurant, O.M.D. a hinca B. cu un cuchiu di cushina. Den Corte, O.M.D. ta desmenti di a hinca B. y a bisa cu e tempo ey e no tabata na Aruba sino na Venezuela. Hues a bisa cu remarcable ta cu un seguridad di e club a bisa cu ta O.M.D. E manager di e club nocturno y restaurant tambe a bisa, cu na Januari 2019, O.M.D. tabata traha como koki eynan. Hues a bisa cu segun investigacion, O.M.D. a sali for di Aruba na 2018 via Aeropuerto. M.D. a bisa cu el a bolbe via boto pero na 2020.
Victima a keda den coma 10 dia: Ruman muher di victima B., a hiba palabra den Corte. El a bisa cu su ruman ta actualmente na Hulanda y ta bayendo bon. El a bisa cu su ruman ta exigi 35 mil Florin. E ruman muher a bisa Hues cu 2 aña, B. a keda sin trabao. E ruman a bisa Hues cu un aña largo su ruman tabata cu un herida habri. El a keda cu trauma.
E ruman a bisa cu B. tabata na e lugar robez y na e momento robez. El a bisa cu su ruman no tabata sa di nada. Ta siman pasa el a worde notifica di e caso y no sa mes kende ta e sospechoso. Hues a bisa cu mirando e situacion cu e ruman a pasa aden, lo ta mihor un caso civil. Na yoramento e ruman a bisa Hues cu B. tabata 10 dia den un coma induci, sino e lo no a sobrevivi. Awor e ta scucha cu O.M.D. ta desmenti. E ruman a sigui bisa cu 10 cm di tripa di B. mester a worde kita y mester a atende cu e corta ader principal cu O.M.D. a corta. E ruman, cu wowo na awa, a puntra “pakico”. El a bisa O.M.D. pa bisa e berdad.
Fiscal: Den su requisitorio, Fiscal a bisa Hues cu e caso di hincamento riba 18 Februari 2019 banda di De Olde Molen, ta worde sospecha di intento di mata. Fiscal a bisa cu tin testigo a declara di a mira O.M.D., e koki di e restaurant, hinca e victima homber B. na su barica. B. a keda interna den hospital.
Fiscal a bisa cu riba video di seguridad no por identifica O.M.D. pero si ta mira un hende a bay riba B. y hink’e cu cuchiu. O.M.D. tabata traha na e restaurant. Na opinion di Fiscal, kico tabata e motibo cu O.M.B. a hinca B. cu cuchiu, no ta conoci. Fiscal a mustra cu e hecho cu O.M.D. a hinca B., cu cuchiu den stoma, esaki ta haci cu e chens ta grandi cu e victima por a muri.
Fiscal a bisa Hues cu no tin raport medico cu ta describi e situacion di B. y no sa cuanto tempo a dura cu B. a cura. Tur esaki ta haci cu Fiscal no tin prueba pa castiga O.M.D. pa intento di mata. Fiscal a bisa Hues cu e ta haya O.M.D. culpabel di maltrato severo.
Pa e caso di importacion di droga y e caso di hincamento, Fiscal a exigi 4 aña y 6 luna di prison. Hues a bisa cu e ta bay studia e caso y dentro di algun siman lo tin sentencia.
