Sospechoso di asesina menor di edad diripiente awor kier ‘bisa e berdad’

Sospechoso di asesina menor di edad diripiente awor kier ‘bisa e berdad’

Tiramento den parkinglot di Stadion Nadi Croes/Crismo Angela

  • Esaki a socede durante ‘Pro-Forma’ den Corte di Husticia
  • Hues a dicidi pa atende casso di Ferdinand Erasmus te Februari 2027 

ORANJESTAD (AAN): E acusado masculino, Ferdinand Erasmus di 23 aña, a presenta dilanti Hues den sala di Corte pero e caso a keda pospone. Ta asina cu e caso tabata pro-forma o sea cu no lo wordo trata. Hues a bisa cu ainda e procesverbaal di Autoridad Hudicial no ta cla. Tata di e victima Rayshon Kelly, tabata presente cu abogado.

    Diferente acusacion: Fiscal a bisa cu e tin diferente acusacion contra e sospechoso Ferdinand.    E promer acusacion ta cu riba 22 Juli 2026, intencional Ferdinand a tira e hoben Rayshon E. Kelly di apenas 16 aña di edad mata riba parkinglot pazuid di Stadion Nadi Croes/Crismo Angela na Rooi Bosal.  Fiscal a sigui bisa cu Ferdinand a tira diferente biaha.

   E di dos acusacion ta cu e mesun dia hunto cu otro, Ferdinand tabata den posesion di arma di candela y municion.

   E di tres acusacion ta cu riba e mesun dia hunto cu otro, Ferdinand a cumpra un cantidad di marihuana, transporta e droga y tabatin e droga den posesion.

   Tin otro grupo envolvi: Fiscal a bisa Hues cu tin un otro grupo envolvi y a pospone e caso ey pa otro aña. Fiscal a sigui bisa cu e no sa cu lo ta bon pa trata e dos casonan hunto pero separa. El a bisa cu relaciona cu e caso contra Ferdinand, ainda Polis ta bezig y ta calcula cu na fin di November 2026 e procesverbaal di Recherche lo ta cla.

    Fiscal a mustra cu tin peticion pa laga Reclassering traha raport y tambe laga Psicologo y Psikiatra papia y check Ferdinand.

   Trata e casonan separa: Fiscal a propone na Hues pa trata e caso contra Ferdinand riba 12 Februari 2027.

   Fiscal a splica cu e otro grupo ta e grupo cu tabata hunto cu e victima Rayshon Kelly.

    Hues a puntra si e ta practico pa trata tur dos caso hunto. Fiscal a propone cu lo por trata un grupo mainta y e otro grupo merdia of trata un caso riba un dia y e otro caso e siman despues.

   Sospechoso kier papia e berdad: Hues a bisa cu anteriormente, miembronan di Recherche a interoga  Ferdinand y el a bisa cu e tabatin e arma den man pero e no tabata sa cu e arma tabatin bala aden. El a kere cu e arma tabata bashi.

   Ferdinand a bisa Hues cu tin algun cos cu e no a declara na Recherche. El a bisa cu el a papia cu su mayornan y awor e kier papia e berdad. Ainda e lo mester bay declara na Recherche. El a bisa cu e caso ta traha riba dje. El a bisa cu ni e, ni e victima mester tabata eynan e anochi ey.

   Abogado kier mas investigacion: Abogado mr. D. Croes a bisa Hues cu ora e procesverbaal keda cla, e kier tin e chens pa haci peticion pa mas investigacion. E abogado a remarca cu ainda no tin investigacion con e bala a bay. El a bisa cu lo ta bon pa Recherche haci un reconstruccion di e tiramento na veld di Winston.

   Lo trata caso na Februari 2027: Hues a bisa cu e pregunta ta si por trata e dos casonan hunto. Abogado mr. Croes a bisa cu lo ta mihor trata nan separa. Hues ta haya cu no ta logistico pa trata e dos casonan hunto. Hues a dicidi cu 24 Februari 2027, lo trata e caso penal contra Ferdinand 8.30 mainta y e siman despues lo trata e caso contra e otro grupo cu tabata hunto cu e victima.