ORANJESTAD (AAN): Diabierna mainta Hues a dicta sentencia den e caso penal cu Ministerio Publico a cuminsa contra e homber B.B., kende ta worde acusa di a hinca e homber G.P. 4 biaha riba 23 October 2022 banda di South Beach.
Ta asina cu luna pasa Fiscal a bisa cu e ta haya B.B. culpabel di intento di mata y a exigi 6 aña di prison.
INTENTO DI ASESINATO
Diabierna mainta den sala di Corte tabata presente e victima G.P. hunto cu su mayornan. Den sala di Corte a presente e acusado B.B. Hues a bisa cu e ta haya legalmente proba intento di asesinato.
HINCA 4 BIAHA
Hues a bisa cu B.B. a hinca G.P. 1 biaha den pecho, 1 biaha den barica y 2 biaha den lomba cu un cuchio di 10 cm. En total G.P. a sufri 4 hinca. Hues a bisa cu dokter a constata cu G.P. a sufri hinca hundo na su lomba cu a perfora su riñon.
Na opinion di Hues, esey ta mustra cu B.B. a hinca cu forza. Hues a sigui bisa cu tur hende sa cu den barica, pecho y lomba tin organonan vital. Hues ta haya cu B.B. a tuma riesgo cu e victima G.P. por a muri.
Hues a bisa cu e no ta haya proba cu intencional B.B. a hinca G.P. Pero si Hues ta haya cu B.B. a hinca G.P. varios biaha.
Hues a bisa cu e ta rechaza defensa cu otro hende lo a hinca tambe. Na opinion di Hues, no tin ningun indicacion pa esey.
CASTIGO
Hues a bisa cu pa cu e castigo, e ta tene cuenta cu seriedad di e hecho cu e victima G.P. por a muri. Hues a mustra cu victimanan di hinca por keda traumatisa.
Hues a mustra cu e hincamento a sosode den un area caminda tin hopi turista. Esaki por afecta turismo di Aruba.
Hues a tene cuenta tambe cu no ta promer biaha cu ta condena B.B. pa intento di mata.
Hues a bisa cu e ta confirma e exigencia di Fiscal. El a condena B.B. na 6 aña di prison, kitando e tempo cu e ta sera den KIA.
Tambe Hues a aproba un parti di e demandanan di daño. El a aproba 5 mil florin di daño material pa e victima G.P., 2500 florin di daño material pa e mama di G.P., kende mester a percura pa G.P. Pa loke ta e demanda inmaterial, Hues a declara esaki no admisibel y a bisa cu e mayornan por cuminsa un caso civil si nan kier.
Hues tambe a ordena pa medida di pago contra B.B. y si e no paga e lo mester bay 154 dia sera.
