Hues ta haya e homber culpabel di intento di mata
ORANJESTAD (AAN): E homber Colombiano R.M. biba na Aruba, Diahuebs mainta a presenta dilanti Hues pa dos caso, caminda el a menaza en total 5 agente di Polis. Den un caso el a menaza 2 agente di lo mata nan y algun dia despues, el a bay riba 3 otro agente di Polis cu cuchiu. Apesar cu dos agente a los tiro di advertencia, R.M. a sigui bay riba nan y e ora ey un otro agente a tir’e.
Menaza tres agente di polis: E promer acusacion cu ta acusa R.M. cu riba 16 December 2021 el a menaza 2 agente di Polis cu morto y tambe a haci destruccion den un cel. Tambe e ta wordo acusa di intento di mata y menaza riba 20 December 2021 di 3 agente di Polis. R.M. tabatin cu cuchiu den man y bay riba nan. Hues a bisa cu riba peticion di abogado, a pospone tratamento di e promer caso pa laga psycologo evalua R.M. pasobra e tabata bati su curpa den cel na warda di Polis. Ta asina cu Fiscal a exigi trabao pa comunidad. E caso a keda pospone te awor.
Polis a tira homber cu cuchiu: E caso di 20 December 2021, R.M. a bisa Hues cu e dia ey, Polis a saca arma den cas p’e. El a bisa Hues cu algun dia promer el a sali for di warda di Polis y tabata hopi depresivo. El a bisa cu 3 agente a baha for di promer piso di e cas y R.M. a bay tras di nan cu cuchiu den man y tabata discuti cu un di e agentenan. R.M. a bisa Hues cu un di e agentenan a bis’e pa benta e cuchiu abao. Segun R.M., di biaha el a scucha 3 tiro a cay. Dos tiro tabata di advertencia y un tiro tabata dirigi riba dje y a herid’e. Hues a remarca pakico R.M. a bay cu cuchiu riba nan. Segun R.M., ora e sinti panico e ta reacciona asina. Hues a remarca pakico a bay tras di e agentenan cu cuchiu den man. Segun R.M., su intension no tabata nada malo.
Hues a bisa cu e agentenan di Polis a haci denuncia. Nan a haci denuncia di intento di asesinato. Nan a bisa cu nan a bay na e cas na Paradijs na Playa relaciona cu un caso di un dama den dificultad. Via fundacion Hende Muher Den Dificultad a bay yuda. A compaña e dama pa bay e cas pa e coy su cosnan. Den e cas a topa cu e homber R.M. y un agente a yuda e dama coy su cosnan. Ora nan a caba y tabata baha trapi, R.M. a bay cu cuchiu nan tras. E agentenan ta declara cu pafor di e cas a ordena R.M. pa benta e cuchiu abao. E no kier a haci caso. A los 2 tiro di advertencia y asina mes R.M. a sigui bay cu cuchiu riba nan. E agentenan a describe cu R.M. tabatin e cuchiu den man na halto manera e kier hinca nan. E ora ey a los un tiro riba dje. Ora cu R.M. a cay riba caminda, a kita cuchiu for di dje y a yama ambulance. E agentenan a bisa cu nan a sinti nan mesa menaza.
Hues a bisa cu R.M. a keda gravemente herida y a keda 3 luna den hospital. Te 1 September 2022 el a wordo deteni pa loke a sosode casi 1 aña promer.
Hues a mustra cu R.M. a declara cu un di e agentenan a papia fresco cun’e y a surgi discusion y e agente a saca su arma pone na banda. R.M. a bisa cu e ta un patient psikiatrico y e situacion ey a pone cu el a perde cabez. El a coy cuchiu y bay tras di e agentenan. Pafor di e caso, e agentenan a bis’e pa pone e cuchiu abao. Un agente a tira den halto, un otro agente a tira abao y esun cu e tabatin discusion cun’e a tir’e. E tiro a perfora su higra. Segun R.M. e sa cu e tabata fout pero ningun momento su intension tabata pa hinca e agentenan. El a bisa cu e mester a haya 5 operacion.
R.M. a wordo interoga tambe pa Landsrecherche relaciona cu e tiramento. Hues a mustra cu 16 December 2021, R.M. a wordo deteni pasobra e tabata bou influencia. Den patruya, el a menaza e agentenan cu e lo mata nan. R.M. a wordo sera 3 dia den un cel sunu, debi na su comportacion agresivo. Ora el a sali, el a bay cas y atrobe tabatin problema cu su pareha y Polis a bolbe detene. El a keda deteni 1 dia y despues laga liber. R.M. a bay drumi na cas pasobra no tabatin hende. Na dado momento el a scucha stemnan y el a bira depresivo pasobra e tin dianan sin bebe medicamento pa su depresividad. El a bay discuti fuerte cu e agente di Polis, mientras cu e pareha tabata cu e otro agentenan. Na dado momento el a bay sinta, mientras cu e pareha a bay coy su pañanan. Ora nan tabata saliendo, el a coy un cuchiu y bay riba nan. Te 17 Maart 2022 el a sali for di hospital. Dos biaha el a haya infeccion. El a splica Hues cu el a keda cu presion halto y no por traha hopi tempo. Maximo 1 lunar y mitar pasobra e ta haya dolor. Hues a bisa cu segun raport medico, a perfora R.M. su higra y mester a haci pasa basta operacion.
Reclassering: Hues a bisa cu e raport di Reclassering ta mustra cu segun R.M., ta Polis a provoca su actuacion. Door di su problema mental el a actua asina. Desde 1992, R.M. a bin Aruba. R.M., door di depression, un biaha a purba mata su curpa. Reclassering ta haya cu R.M. mester cay bou guia pa monitor cu e ta tuma medicamento.
Psicologo: Psicologo ta haya cu R.M. no tin problema psikiatrico pero si cu door di uso di alcohol, cocaina y depresividad a pone actua asina. E tempo ey, R.M. tabata bebe hopi y tabata bou influencia ora e tiramento a sosode. Psicologo ta haya cu R.M. ta menos responsabel pa su actonan. Psicologo ta mustra cu e chens ta grandi, cu si R.M. cay den stress grandi, R.M. lo bay uza alcohol y droga. Pesey R.M. mester haya tratamento.
Segun R.M., desde 11 Augustus 2022 el a bay Stichting Hunto y e aña aki el a caba e tratamento y di psikiatrico pa no cay bek den alcohol y droga.
Fiscal: Fiscal a bisa Hues e caso di 16 December 2021 ya tin un exigencia. Tabatin menaza di 2 agente di Polis y destruccion na warda di Polis. Fiscal ta haya e caso di 20 December 2021, ta legalmente proba cu R.M. a bay cu cuchiu riba 3 agente di Polis. Fiscal a bisa cu e tres agentenan a haci denuncia y ningun a bisa cu a saca arma den e cas. E unico hende cu ta papia di saca arma ta R.M. Pesey Fiscal ta haya cu no tin prueba pa esey.
Pa cu e castigo, Fiscal a bisa cu e ta tene cuenta cu e raport di psicologo cu R.M. ta menos responsabel pa su actonan. Tambe Fiscal a tene cuenta cu raport di Reclassering. Fiscal a bisa cu e ta tene cuenta tambe cu e caso ta basta tempo pasa. Fiscal ta contento di tende cu R.M. a haya tratamento pero e ta haya cu lo ta bon pa keda bao guia di Reclassering. Fiscal no ta kere cu R.M. mester bay KIA. El a exigi 30 dia di prison, di cual 20 dia ta condicional cu un tempo di prueba di 2 aña y bou guia di Reclassering.
Abogado: mr. Carlo a bisa Hues cu R.M., riba su mes a bay busca ayudo. E abogado a mustra cu na Colombia R.M. a pasa den hopi cos tristo. Dos ruman di dje a wordo mata y un ruman ta sicario den un grupo. E abogado a bisa cu esaki a afecta R.M. masha hopi.
Abogado ta haya cu agentenan no a actua professional y esey a pone cu R.M. a actua asina. E ta haya cu mester declara R.M. liber. El a bisa cu R.M. tabata papia Spaño cu e agentenan y no a papia Papiamento. El a bisa cu R.M. a bisa e agente cu e ta duro pasobra cu e ta cu e otronan y e ta geboei. El a bisa pakico e no ta bay su so riba dje y kita su boeinan. El a invita e agente pa bringa. Segun abogado, na warda di Polis, 3 agente a bati R.M. Den su rabia, R.M. a kibra un baki di sushi na warda di Polis, Macuarima. El a cana di Macuarima te Paradijs na Playa ora el a wordo laga liber dia 20 December 2021.
E abogado a bisa Hues cu Polis a presenta na e cas cu R.M. su ex pareha. Na dado momento un agente lo a saca su arma y zwaai esaki. R.M. a bira depresivo y a pasa man pa un cuchiu. El a bay nan tras y un agente a tir’e. El a keda 3 luna interna den hospital y a keda afecta pa por haci trabao den construccion. E abogado a bisa cu 1 aña largo, R.M. tabata bou guia di Reclassering y riba su mes a bay rehabilita di adiccion na alcohol y droga. E abogado a sigui bisa cu R.M. tambe a haya tratamento pa su depresividad. El a conclui cu mester declara R.M. liber. Na opinion di abogado, hopi tempo a transcuri y no ta na su lugar pa duna castigo.
Sentencia: Hues, despues di a scucha R.M. su ultimo palabra, a sera tratamento di e caso y a dicta sentencia di biaha. Hues a bisa cu e ta haya legalmente proba cu R.M. a kibra un baki di sushi y un porta di cel na warda di Polis. Tambe Hues ta haya legalmente proba cu R.M. a menaza e 2 agentenan. Den caso cu a coy cuchiu y bay tras di 3 agentenan di Polis, Hues ta haya esaki ta un menaza tambe. Pa cu e castigo, Hues a tene cuenta cu raport di Reclassering y Psicologo. Tambe a tene cuenta cu e casonan ta bieu, esta di 2021. Hues ta haya cu mester pone R.M. bau guia di Reclassering, pa nan dicidi si R.M. mester di mas tratamento of no. Hues a condena R.M. na 20 dia di prison di cual 12 dia ta condicional cu 2 aña di prueba. E periodo di prueba lo ta bao guia di Reclassering. Hues ta haya importante pa R.M. sigui usa medicamento.
