Hues no ta haya proba asesinato sino homicidio --- ORANJESTAD (AAN): Diahuebs pa 2’or di atardi, Hues di Corte di Husticia a dicta sentencia den e caso penal cu Ministerio Publico a cuminsa contra Pascual Brown, kende ta wordo acusa di a tira mata Richi Henao Tavarez riba 12 di April 2021.
Hues no a bay di acuerdo cu e punto di bista y tampoco e exigencia di Fiscal. Hues ta haya cu no por papia di premedita, esta asesinato sino cu Brown a tira mata Richi. Hues a baha e castigo exigi pa Fiscal di 16 aña pa 10 aña y 6 luna di prison.
Luna pasa tratamento di e caso a tuma lugar caminda Hues a mustra riba e raport di psikiatra cu a conclui cu Brown ta sufri problema mental y esey a causa cu el a tira mata.
FISCAL
Fiscal durante tratamento di e caso a bisa cu e ta haya cu premedita Brown a tira mata Tavarez. Segun sentencia di Corte Supremo e hecho cu e sospechoso tin un problema mental, no ta motibo pa bisa cu e no ta culpable. El a mustra cu Brown a sali for di Playa bay te Brazil. Na caminda el a haya un arma di candela. A dura 15 minuut promer cu el a yega na e cas. Fiscal ta haya cu tabatin tur tempo pa Brown para y bay bek. Brown mes a bisa cu el a mira cu e partner di Tavarez a mir’e pero asina mes el a tira. Fiscal a remarca cu Brown no a mustra cu ta duel’e loke el a haci. Teniendo cuenta cu e raport di psikiatra, Fiscal a exigi 16 aña di prison.
ABOGADO
Abogado mr. Jurney Tromp a mustra cu Brown a perde cabez y a los un tiro. E momento ey, Brown no ta tabata su mes. E tabata paranoid manera psikiatra mes ta skirbi den su raport. Psikiatra mes ta bisa cu door di e paranoid, Brown a bay tira Richi. E abogado ta haya cu mester mira den forma critico e termino premedita. E abogado tambe a bisa cu no por bisa di kico Richi a muri pasobra no tin un raport di patologo cu ta bisa e causa di morto.
SENTENCIA
Via video conference Hues a dicta sentencia. Den sala di Corte tabata presente abogado mr. Jurney Tromp, e mama di Brown, Fiscal y Hues.
Hues a bisa cu e ta haya legalmente proba cu 12 April 2021, Brown a bay cu un arma di candela na cas di Richi. A tira un biaha y alcanza Richi den cabez. For di procesverbaal di Polis por compronde cu ainda e bala tabata den cabez. Segun patologo, e bala den cabez a causa e morto. Hues a bisa cu e ta rechaza e ponencia di abogado. El a bisa cu ta conoci cu si tira cu un arma di candela den direccion di un hende, e persona por muri.
NO PROBA ASESINATO
Pa e acusacion asesinato o sea premedita, Hues no ta haya cu tin suficiente prueba. El a mustra cu Brown a declara cu e tabata na vuurtoren y a sinti algo. El a dicidi di bay papia cu Richi y regla e mal comprendimento, e usamento di droga di Richi y e trato cu Richi ta duna Lis. Na caminda el a topa un homber Venezolano y a cumpra un arma. Na cas di Richi, yen cos a pasa den Brown su cabez y el a perde cabez. El a saca arma y ora el a mira cu Lis a mir’e, el a tira. Na opinion di Hues, mirando e declaracionnan aki y raport di psikiatra no por exclui cu Brown su emocionnan a subi. Pesey ta e haya cu no por proba asesinato pero mata.
Hues a bisa cu si un hende tin problema mental, lo por conclui si un persona ta conciente kico e ta haci. Den e caso aki psikiatra ta haya cu Brown ta conciente kico el a haci.
BAHA CASTIGO EXIGI
Pa cu e castigo, Hues a bisa cu e ta tene cuenta cu seriedad di e caso. A kita bida di un hende y laga tristeza atras. Hues a sigui bisa cu e ta tene cuenta cu castigo di Hof. Tambe Hues a tene cuenta cu psikiatra ta bisa cu Brown no ta completo responsabel.
Hues a condena Brown na 10 aña y 6 luna di prison.
ABOGADO CONSOLA MAMA
Despues di e sentencia, abogado mr. Jurney Tromp a splica e mama di Brown e sentencia. E mama a braza e abogado y cuminsa yora. Pa basta rato tabatin un momento hopi emocionante, caminda por mira e abogado consola e mama di Brown.
