Abogado ta haya cu tin puro speculacionnan
ORANJESTAD (AAN): Tin un escandalo na Warda Costa, cu ta worde trata den Corte di Husticia, unda tin 5 miembro di Warda Costa ta worde sospecha di ta envolvi den traficacion di droga y hende. Ta asina cu tin dos di e sospechosonan esta Heyliger y Boekhoudt cu a presenta den Corte. Nan caso a worde trata separa.
Heyliger a worde condena caba y ta sintando castigo den KIA. Boekhoudt su caso a worde trata recien caminda Fiscal a exigi 9 aña di prison p’e y dentro di 2 siman lo tin sentencia.
Piscador sospecha di trece droga: Recien, Corte di Husticia a trata e caso penal cu Ministerio Publico a cuminsa contra e piscado Alberto Laveist, kende actualmente ta sintando castigo relaciona cu e caso di e dama Venezolana cu a perde riba laman, Yohana, riba 22 Maart 2023.
E caso contra Laveist tambe a worde trata separa. Fiscal ta acusa Laveist cu entre 1 Januari 2023 te cu 13 Februari 2023 lo tabata envolvi den traficacion di droga pa e sospechosonan di Warda Costa. Ta sera papia di 100 kilo di cocaine cu lo mester a trece 17 Januari 2023 y un otro lote 17 Maart 2023.
Fiscal a exigi 5 aña di prison: Ta asina cu Fiscal den su requisitorio, a splica cu e ta haya Laveist culpabel di e acusacionnan. A base di tur prueba, el a exigi pa Huez impone un castigo di 5 aña di prison.
Abogado ta cuestiona investigacion: Abogado mr. G. de Hoogd a bisa Hues cu e acusacion di 17 Maart 2023 ta keda leu di e acusacion di Januari 2023 y e ta haya cu no tin prueba. E abogado ta haya cu Fiscal a bruha dos caso den otro. E ta referi aki na e caso di e dama Yohana cu a perde riba laman, caso Salacia cu e caso Watapana cu ta e caso contra Warda Costa.
E abogado a bisa cu door di e caso Salacia, Polis a confisca e cellular di Laveist y ta bin cu speculacionnan. El a mustra cu Fiscal ta bin cu speculacionnan. E abogado a bisa cu Fiscal ta bisa cu riba 15 Januari 2023, e sospechoso Wernet di Guada Costa, kende a mata su mes, a manda mensahe pa Laveist pa trece 100 kilo di cocaine. Wernet a ofrece pa paga Laveist 800 Dollar pa kilo, pa busca e droga for di un boto riba laman y trece esaki Aruba.
E abogado ta di opinion cu Laveist no a reacciona riba e oferta aki. Na opinion di abogado, e hecho cu 17 Januari 2023, Laveist ta bisa Wernet cu e boto ya ta full di getankt, esey no kiermen cu e ta bay busca e droga sino a bay pisca. E ta haya cu Fiscal ta purba pinta manera cu Laveist a bay busca e droga.
Speculacionnan sin prueba: E abogado ta haya cu Fiscal ta bin cu speculacionnan, sin tin prueba concreto. El a mustra cu Fiscal ta bisa cu Laveist a cobra 80 mil Dollar pa entrega e 100 kilo di cocaine y cu Wernet a paga 28 mil Florin y ainda falta 112 mil Florin. Segun abogado, Fiscal ta bisa cu Wernet a mata su mes y cu a keda un debe na Laveist di 112 Florin. E ta haya cu tur e speculacionnan aki di Fiscal por worde tira den bari di sushi.
E abogado a bisa Hues cu Fiscal ta crea e sospecho di un organizacion criminal entre Laveist y e grupo di Warda Costa siendo cu en realidad a bruha e caso di Salacia cu e caso Watapana.
Kier castiga Laveist dos biaha: mr. de Hoogd a bisa Hues cu den e caso Salacia, a condena Laveist na 5 aña di prison. Ta asina cu a apela e sentencia y ainda falta e tratamento pa tuma lugar. E abogado ta haya cu lo tabata na su lugar pa a trata e caso Salacia hunto cu Watapana.
Awor tin e situacion cu Fiscal kier castiga Laveist dos biaha 5 aña y abogado ta haya cu esey no ta corecto.
Hues a sera tratamento di e caso y a bisa cu dia 25 November lo tin sentencia.
