Abogadonan mr. Sulvaran y mr. Mohamed --- *Polis a improvisa y traduci cosnan cu no ta cuadra cu e berdad
ORANJESTAD (AAN): Diahuebs mainta e hombernan Venezolano biba na Aruba, R.G.Z. y J.T.R., a presenta den Corte pa e caso penal cu Ministerio Publico a cuminsa contra nan. Nan ta wordo acusa di falsificacion y labamento di placa riba 9 Februari 2018.
E caso ta relaciona cu e 46 baranan di oro cu a detene R.G.Z. cu ne na aeropuerto, na momento cu e kier a viaha pa Hulanda. R.G.Z. a bisa cu ta J.T.R. a bis’e pa hiba e baranan di oro Dubai. Fiscal ta haya nan culpable di transporte ilegal di 46 bara di oro cu ta pisa 55 kilo. Fiscal a exigi 12 luna di prison pa J.T.R. di cual 6 luna ta condicional y castigo di prison igual na loke R.G.Z. tabata sera. Tambe el a exigi pa confisca e 46 baranan di oro cu ta hinca den un caha fuerte na Banco Central.
Abogadonan mr. Sulvaran y mr. Mohamed a cuestiona e investigacion haci pa agentenan Hulandes cu a copia informacion for di internet y traduci esaki completamente robez. Nan ta haya cu mester declara R.G.Z. y J.T.R. liber pasobra nan no a haci nada contra ley. Segun e abogadonan, miembronan di Douane Aruba a declara cu henter e proceso di exporta baranan di oro tabata di acuerdo cu ley.
Tratamento di e caso a dura henter mainta y te den oranan di merdia. Den e articulo aki, DIARIO ta publica e defensa hiba pa abogadonan mr. Sulvaran y mr. Mohamed, kendenan hunto a defende e duo R.G.Z. y J.T.R. Den un otro articulo ta publica e tratamento di e caso y exigencia di Fiscal.
FISCAL Y POLIS A PINTA E DUO COMO CRIMINAL
Abogado mr. Sulvaran a hiba palabra ayera y tabata hopi skerpi den su defensa, caminda e tabata cuestiona e forma con agentenan Hulandes a haci investigacion. E abogado a bisa Hues cu e agentenan di RST, sin haci uso di traductor, tabata saca informacion for di internet y ta improvisa cosnan cu no ta cuadra cu e berdad.
Mr. Sulvaran a bisa Hues cu for di principio Fiscal y Polis a pinta e duo R.G.Z. y J.T.R. como criminal. Hopi cos, Polis mes a improvisa pero no tin ningun prueba. No tin ningun investigacion drechi. Nan a basa nan mes riba loke a haya riba internet. E abogado a bisa Hues cu mester evalua e caso basa riba loke tin, esta e documentonan y no loke e miembronan di RST a improvisa. E abogado ta haya cu Polis ta pone hopi cos den e procesverbaal, pa pinta e duo como culpable.
El a expresa cu e no por kere cu dos hende drechi a haci algo contra ley. No tin ningun prueba cu nan a falsifica documento y mucho menos laba placa.
E abogado a mustra cu miembronan di Douane Aruba a declara cu tur e documentonan ta legal y no tin nada contra ley haci pa cu e transporte di baranan di oro. E abogado ta haya cu mester declara R.G.Z. y J.R.T. liber.
POLIS A IMPROVISA INFORMACION
Mr. Sulvaran a remarca na Hues, con por bay kere e procesverbaal di Polis cu ta basa riba informacion di internet. Polis a improvisa cosnan a base di nan propio pensamento y no a base di investigacion. Esaki ta violacion di e sistema penal. E abogado a bisa Hues cu Polis no por bin cu storianan di “cowboy” pa hustifica cu e duo ta culpable.
FISCAL TA HIBA MANEHO RACISTA
E abogado a bisa Hues cu e ta haya cu Fiscal tambe ta basa su mes riba informacion di internet. El a señala cu for di e procesverbaal por conclui cu Fiscal ta hiba un maneho racista contra e duo cu ta pinta cu ta di Venezuela. E abogado a cuestiona esaki mustrando cu e ta tuma esaki personal pasobra e tambe ta Venezuela. El a remarca cu Fiscal y RST ta pinta e duo aki di ta Venezolano, siendo nan tin pasaporte Hulandes masha tempo caba. Pues nan ta Hulandes pa mas cu 20 aña! Na dado momento Fiscal a reclama cu constantemente mr. Sulvaran ta menciona racista y pa e stop. Mr. Sulvaran a reacciona cu e ta lesando loke ta para den e procesverbaal y Fiscal sa masha bon. Hues a intermedia y a bisa cu Fiscal por reacciona despues.
FAYA DEN HACI INVESTIGACION
Na opinion di mr. Sulvaran, autoridad no a haci nunca investigacion riba e documentonan. Tampoco riba e storia cu lo a smelta 37 bara di oro na Zona Liber na Aruba. El a bisa cu el a haci investigacion y a resulta cu no tin un lugar pa smelt oro na Zona Liber. El a sigui bisa cu ta ser menciona cu J.T.R. lo tin baranan di oro na Domesa. Ningun momento a haci investigacion y no ta berdad.
E abogado a remarca cu tur e informacionnan aki ta para den e procesverbaal di Polis. E ta haya cu den e caso aki mester a usa un traductor ora cu e duo sospechoso ta wordo interoga y nan declaracion ta wordo pone manera e ta. Nan no ta compronde Hulandes pero tin cu firma documento cu ta skirbi na Hulandes.
E abogado a sigui bisa cu Polis a usa un potret di 2 miyon dollar y ta pretende cu a paga cash pa e oro, siendo cu no ta asina. Ta papia cu un hende cu un tas cu 2 miyon dollar lo a bay na e negoshi pa cumpra oro. E abogado a splica cu riba factura ta para cu a paga “contado”. E miembronan di RST a traduci esaki literal como “cash” pero nan no ta compronde cu “contado” kiermen cu ta cancela e debe di biaha. Esey por ta via cheque of transfer y no necesariamente cu placa cash. El a bisa cu a scucha testigo na Venezuela kende a bisa cu, paga cu placa cash ta imposibel.
TRANSPORTE DI ORO TA LEGAL
E abogado a mustra cu RST ta specula cu e transporte di oro tin di haci cu situacion politico na Venezuela. El a mustra cu tur e añanan a transporta oro tanto pa Belgica, Dubai, Merca, Surnam sin ningun problema. Awor diripiente ta bisa cu no ta para riba documento cu e oro ta procedente di Venezuela.
E abogado a mustra Hues cu tanto Douane di Aruba como Curacao ta haya cu no tin transporte ilegal di oro. Nan ta haya cu e documentonan ta cumpli cu ley.
E ta haya cu Fiscal delibera a bay persigui e duo aki. Mr. Sulvaran ta haya cu mester declara e duo G.R.Z. y J.T.R. liber di tur dos acusacion.
Hues a keda di studia e caso y dia 14 July 2022 lo tin sentencia.
