Abogado di hacker cu a chantahea victimanan a bisa
ORANJESTAD (AAN): Abogado mr. Illes, a reacciona fuerte riba e exigencia di Fiscal di 5 aña di prison pa e homber D.E., kende ta wordo haya culpabel di a hack y chantahea tres dama y a viola un di e damanan.
CASTIGO TA MUCHO HALTO
Mr. Illes a bisa Hues cu e ta haya e exigencia di Fiscal mucho halto. E abogado a bisa cu Fiscal no a tene cuenta cu e situacion mental di D.E., manera psicologo y psychiater ta mustra.
NO TABATIN VIOLACION
E abogado a bisa cu D.E. a bisa Hues cu e tabatin relacion sexual cu e dama S. y cu esaki tabata cu aprobacion di S. E abogado ta haya cu no tin prueba di violacion y mester declara D.E. liber y cu e demanda di daño di e dama S., mester wordo poni un banda. E abogado ta haya cu e demanda di S. ta asina compleho pa wordo trata den un caso penal. E ta haya un caso civil na su lugar.
NO A HACK
E abogado a bisa Hues cu D.E. no tin conocimento di hack account manera Fiscal ta bisa. E ta haya cu mester declara D.E. liber pa esaki. E abogado a bisa cu D.E. ta admiti di a haci malo y mester haya castigo. Na opinion di e abogado, Hues mester tene cuenta cu raport di psicologo y pshychiater kendenan ta mustra cu door di e problema mental di D.E., e ta menos responsabel pa loke el a haci.
VIGILA PA NO MATA CURPA
Mr. Illes a bisa Hues cu den KIA, D.E. ta bou vigilancia special pa no mata curpa. E abogado a sigui bisa cu den KIA, D.E. no ta haya e tratamento adecua. E ta haya cu Hues mester tene cuenta cu e caso a dura masha hopi, promer cu e caso a bin dilanti.
MERECE TRATAMENTO
E abogado ta haya cu tambe Hues mester tene cuenta cu D.E. merece di haya tratamento. Tur esaki abogado ta haya cu mester reduci e castigo exigi pa Fiscal. Na opinion di mr. Illes, castigo di prison ta tene D.E. riba un pause cu e no por haci nada, pero tratamento ta trece cambio den su comportacion.
Hues a cera tratamento di e caso y a bisa cu e mester mas tempo pa studia e caso. El a bisa cu 24 April 2026, e lo sera tratamento di e caso y di biaha lo tin sentencia.
