ORANJESTAD (AAN): For di algun luna caba ta conoci cu dialuna mainta mester a tuma lugar e apelacion di Nelson de Andrade (Speed) y Marko Espinoza Cangahuala contra nan sentencia di Juli 2019.
Awor ta resulta cu nan a hala e apelacion aden y awor nan a wordo yama como testigo den e caso di malversacion di radio di Polis.
HALA APELACION ADEN
DIARIO a haci investigacion y a compronde cu siman pasa Nelson de Andrade y Marko Espinoza Cangahuala a presenta na Corte pa hala nan apelacion aden. Den combersacion cu nan abogado mr. Lejuez, el a confirma cu a hala e apelacionnan aden.
Esey ta nifica cu Nelson de Andrade y Marko Espinoza Cangahuala nan condena di Juli 2019 ta keda vigente.
Espinoza: Legalmente proba cu a malversa radio di Polis y radio di patruya di Polis entre 3 December 2015 y Januari 2018, tambe cu a scucha informacionnan. Hunto cu Speed incubrimento di radionan di Polis y tabata scucha informacionnan cu no ta destina pa tercer. Espinoza a wordo condena na 180 ora di trabou of 90 dia sera.
Nelson de Andrade : Legalmente proba cu a malversa radio di Polis y radio di patruya di Polis. Intencionalmente a incubri e radionan. Culpabel hunto cu Espinoza tabata scucha informacion cu no ta destina pa otronan. A duna instruccion na Espinoza pa download programa pa por scucha informacionnan di Polis. Nelson de Andrade a wordo condena na 2 luna di prison condicional cu 3 aña prueba. Ademas 240 ora di trabou of 120 dia sera.
TESTIGO DEN CORTE
Ta asina cu e agente di Polis, Rasmijn, a apela su sentencia y ayera tabatin “regie zitting”den Hof. E regie zitting tabata un preparacion pa e caso di awe. Su abogado mr. Illes a pidi pa scucha Nelson de Andrade y Espinoza como testigo pasobra Rasmijn ta para riba cu e no ta culpable.
Esey ta trece cun’e cu awe mainta tanto Nelson de Andrade como Espinoza mester presenta den Corte di Husticia pa wordo scucha como testigo den e apelacion di Rasmijn. Tin un otro testigo mas B. Winklaar.
Ayera den oranan di atardi, e citacion a wordo manda pa e tres testigonan aki pa nan presenta awe mainta den sala di Corte pa wordo scucha.
Rasmijn na Juli 2019 a wordo condena. Hues ta haya legalmente proba cu a malversa radio di Polis. A usa e radio aki den media pa scucha Polis. Hues ta haya cu Rasmijn a mal usa su posicion. Hues a conden’e igual na Fiscal su exigencia, 240 ora di trabou of 120 dia di prison. Tempo cu tabata sera lo wordo desconta for oranan di trabou
